ნიო-იორკის გენერალურმა პროკურორმა, ბარბარა ანდერვუდმა, მასშტაბური და სისტემატიური კანონდარღვევის ბრალდებით აშშ-ის პრეზიდენტს დონალდ ტრამპს, მის ფონდსა და სამ შვილს სასამართლოში უჩივლა.

ანდერვუდის განმარტებით, საქველმოქმედო ორგანიზაცია უკანონო პოლიტიკური კოორდინაციით იყო დაკავებული, რომლის მიზანიც 2016 წლის არჩევნებზე გავლენის მოხდენა იყო.

პროკურორის განმარტებით, სარჩელი ფონდის დაშლას ისახავს მიზნად. დონალდ ტრამპის გარდა, სარჩელში მოხსენიებული არიან მისი შვილები - ივანკა, ერიკი და დონალდ უმცროსი.

გენერალური პროკურორის განცხადებაში ნათქვამია, რომ ტრამპმა კანონდარღვევით ფონდს დაავალა დახმარებოდა საპრეზიდენტო კამპანიისას და ფონდის სახელი და თანხები გამოიყენა.

სარჩელში ნათქვამია, რომ ტრამპის კუთვნილი გოლფკლუბისა და კურორტის სამართლებრივი დავის მოსაგვარებლად ფონდმა 258 ათასი დოლარი გადაიხადა. ასევე, ფონდმა გამოყო 10 ათასი დოლარი დონალდ ტრამპის პორტრეტისთვის, რომელიც ერთ-ერთ გოლფკლუბში დაკიდეს. პროკურორის განმარტებით, არაკომერციულ ორგანიზაციებთან მსგავსი გარიგებები საგადასახადო დარღვევაა.

სარჩელის საპასუხოდ აშშ-ის პრეზიდენტმა ტვიტერზე დაწერა, რომ ნიო-ორკელი დემოკრატები აკეთებენ ყველაფერს, რათა ფონდის საქმიანობის გამო ციხეში ჩასვან.

პროკურორი მოითხოვს, რომ ნიო-იორკის შტატში დონალდ ტრამპს აეკრძალოს ნებისმიერი არაკომერციული ორგანიზაციის ხელმძღვანელობა ათი წლის განმავლობაში, ხოლო მის შვილებს ერთი წლის განმავლობაში. დონალდ ტრამპის ფონდმა ყველა ბრალდება უარყო.