ხორავას ქუჩის საქმეზე სახალხო დამცველმა, ნინო ლომჯარიამ განაცხადა, რომ დანაშაულის დაფარვის ნაწილში იკვეთებოდა არა მხოლოდ იმ პირთა პასუხისმგებლობის საფუძველი, რომლებიც 9 ივნისამდე იყვნენ პასუხისგებაში მიცემულნი, არამედ, სხვა პირებისაც.

"აღნიშნულთან დაკავშირებით საგამოძიებო მოქმედებები დაგვიანებით, ან საერთოდ არ ჩატარდა", - განაცხადა ლომჯარიამ.

ხორავას ქუჩის საქმის გარემოებების შესახებ სახალხო დამცველმა ბრიფინგზე ისაუბრა. ომბუდსმენის განმარტებით, ის საქმეს ორი მიმართულებით სწავლობს:

  • რამდენად ჩატარდა აუცილებელი საგამოძიებო მოქმედებები ან ჩატარებული საგამოძიებო მოქმედებები რამდენად საკმარისი იყო;
  • რამდენად არიან გამოკვეთილი საქმის მასალებში კონკრეტული პირები, რომელთა პასუხისმგებლობის იდენტიფიცირება შესაძლებელია.

ნინო ლომჯარიამ განმარტა, რომ საქმის შესწავლის შედეგად გაჩნდა კითხვა თუ რატომ არ ამოიღო გამოძიებამ ერთ შემთხვევაში ჩხუბში მონაწილე პირის ტანსაცმელი, მაშინ როდესაც აღნიშნული საგამოძიებო მოქმედება ჩხუბში მონაწილე სხვა პირთა მიმართ ჩატარებულია.

მისივე განმარტებით, გამოიკვეთა, რომ მოწმეთა დაკითხვის დროს არ დასმულა ის კითხვები, რაც დააზუსტებდა ან/და გამოავლენდა აღნიშნული ან სხვა პირების როლს დანაშაულის ჩადენაში. ამავე დროს, დაკითხულები ან გამოკითხულები არ არიან ის პირები, რომელთაც მაღალი ალბათობით გამოძიებისთვის მნიშვნელოვანი კითხვები ჰქონდათ.

ომბუდსმენის თქმით, გამოსაკვლევია ჩხუბში მონაწილე იმ ინდივიდების ბრალეულობის საკითხი, რომლებიც შეიძლება უშუალოდ მკვლელობის აღმსრულებლები არ იყვნენ, მაგრამ შეიძლება ჩადენილი აქვთ სხვა დანაშაული (მაგალითად, ჩხუბში მონაწილე ერთ-ერთი პირის სავარაუდო დაჭრა).

მისივე განმარტებით, დაგვიანებული ექსპერტიზის მიუხედავად საქმის მასალებში შესაძლო სხვა დანაშაულის (დაჭრის) ჩადენის ნიშნები იკვეთებოდა. გამოძიება ამ გარემოებებთან დაკავშირებით არ დაწყებულა:

"ჩვენც პრობლემურად მიგვაჩნია ე.წ. ფარდულის დაშლის ეპიზოდი, რადგან ვერ დავინახეთ, თუ ვინ გასცა მისი დაშლის ნებართვა. ასევე, აღსანიშნავია, რომ ფარდულის პირვანდელი მდგომარეობა არ არის ზუსტად იდენტიფიცირებული".

ლომჯარიამ აღნიშნა, რომ მათ შესასწავლი აქვთ სასამართლო განხილვის მასალები და განაჩენი, რომელიც ჯერ კიდევ არ არის ხელმისაწვდომი:

"ყველა მასალის გაანალიზების შემდეგ, წარმოვუდგენთ საზოგადოებას ჩვენს საბოლოო დასკვნას".

გაიგეთ მეტი: