საქართველოს შინაგან საქმეთა სამინისტროს ინფორმაციით, ბელიაშვილის ქუჩაზე აფრიკელ სტუდენტებზე ძალადობის ფაქტზე საგამოძიებო მოქმედებები ამ დრომდე გრძელდება.

როგორც On.ge-ს შსს-ში განუმარტეს, აღნიშნულ სისხლის სამართლის საქმეზე ჩატარებულია ათობით საგამოძიებო მოქმედება, დანიშნულია ექსპერტიზები, როგორც აფრიკელი სტუდენტების, ისე ჩხუბში მონაწილე ადგილობრივების მიმართ.

შსს-ს განმარტებით, რამდენიმე აფრიკელი სტუდენტი საგამოძიებო მოქმედებებში მონაწილეობაზე უარს აცხადებს.

"ექსპერტიზის დასკვნებს ველოდებით, როცა პასუხებს მივიღებთ, გამოძიება მივა უკვე კულმინაციამე და პროკურატურა მიიღებს შემაჯამებელ გადაწყვეტილებებს. ჯერ გამოძიება გრძელდება", - აცხადებენ შსს-ში.

უწყებაში განმარტეს, რომ საქმე შსს-ს ახალი ადამიანის უფლებათა საერთო დეპარტამენტის კონტროლის ქვეშაა.

დღეს, 8 ივნისს არასამთავრობო ორგანიზაციებმა აფრიკელი სტუდენტების მიმართ, სავარაუდო რასობრივი შეუწყნარებლობის მოტივით ჩადენილი ძალადობის ფაქტზე განცხადება გაავრცელეს.

არასამთავრობოების პოზიციით, გამოძიება არაობიექტურად მიმდინარეობს. მათივე განცხადებით, გამოძიებას საქმისთვის რასობრივი დისკრიმინაციის კვალიფიკაცია არ მიუნიჭებია. ჩატარებულია რამდენიმე საგამოძიებო მოქმედება, თუმცა, დანაშაულის ჩამდენ სავარაუდო პირებს პასუხისმგებლობა ამ დრომდე არ დაკისრებიათ.

"უკიდურესად საგანგაშოა თავად შინაგან საქმეთა სამინისტროს თანამშრომლებისა და პოლიტიკური თანამდებობის პირების სავარაუდო მცდელობა დანაშაულის შესაძლო მიჩქმალვისა და გამოძიების შეწყვეტის მიზნით", - აცხადებენ არასამთავრობოები.