ამერიკული ტექნოლოგიური გიგანტის Apple-ის საბაზრო ღირებულება ყოველდღიურად ტრილიონ დოლარის ზღვარს უახლოვდება. ამგვარად, სტივ ჯობსის მიერ 1976 წელს დაარსებული კომპანია გახდება პირველი კერძო სტრუქტურა, რომლის საბაზრო ღირებულებაც ტრილიონ დოლარს გადააჭარბებს.

ბოლო მონაცემებთ, კომპანიის ჯამური ღირებულება $945 მილიარდია. 2018 წლის განმავლობაში ჯამური მაჩვენებელი 13 პროცენტით გაიზარდა. იმისთვის რომ საბაზრო ღირებულება $1 ტრილიონს გაუტოლდეს, საჭიროა კიდევ 6-პროცენტიანი ზრდა, ანუ კომპანიის ერთი აქცია $202 ნიშნულს უნდა გაუტოლდეს.

ბოლო წლის განმავლობაში, კომპანიის გაყიდვები 16 პროცენტით გაიზარდა, რისი ძირითადი მიზეზი კომპანიის ბოლო პროდუქტია. iPhone 8 და iphone X წლის ყველაზე გაყიდვად სმარტფონებად იქცა.

კომპანიამ, ასევე, სარფიანად გამოიყენა თავისი ნაღდი ფულის მარაგი, რომელიც $267 მილიარდს უტოლდება. აღნიშნული თანხა კომპანიამ, ძირითადად, თავისი ინვესტორების დასაჯილდოვებლად და წასახალისებლად გამოიყენა. კომპანიის ინვესტორთა რიცხვში შედის პლანეტის ერთ-ერთი უმდიდრესი ადამიანი უორენ ბაფეტიც. ბაფეტის ფონდი Berkshire Hathaway, ჯამურად, კომპანიის 75 მილიონ აქციას ფლობს, რაც მას ყველაზე მსხვილ აქციონერად აქცევს.

დიდი ალბათობით, Apple იქნება პირველი კომპანია, რომელიც ტრილიონიან ნიშნულს მიაღწევს, თუმცა არ იქნება ერთადერთი. ბოლო მონაცემებით, Amazon-ის ჯამური ღირებულება დაახლოებით $800 მილიარდია. კომპანია ბოლო წლების განმავლობაში დინამიურად იზრდება და მისი მფლობელიც ჯეფ ბეზოსი $140 მილიარდით პლანეტის უმდიდრესი ადამიანი გახდა.

სავარაუდოდ, რამდენიმე წლის განმავლობაში იგივე ნიშნულს გადალახავს Google და Microfost. ამ კომპანიებიდან თითოეულის ღირებულება $800 მილიარდს უახლოვდება.

ტრილიონიანი ნიშნულის გადასაფარად, სავარაუდოდ, ცოტა უფრო მეტი დრო დასჭირდება Facebook-ს, კომპანიის ჯამური ღირებულება, ბოლო მონაცემებით, დაახლოებით $560 მილიარდია.

ჯამურად, ამერიკული გიგანტების ფასი: Apple, Amazon, Google, Microsoft, Google, დაახლოებით, $4 ტრილიონი ნიშნულს უახლოვდება.