Once Upon a Time in Hollywood (ერთხელ ჰოლივუდში) - ასე ჰქვია კვენტინ ტარანტინოს ახალ ფილმს, რომელშიც მთავარ როლებს ბრედ პიტი და ლეონარდო დიკაპრიო შეასრულებენ.

ცოტა ხნის წინ კი ცნობილი გახდა, რომ პიტსა და დიკაპრიოს ახალი მსახიობები დაკოტა ფენინგი და დემიან ლუისი შეუერთდნენ. ფენინგი ფილმში ჩარლზ მენსონის სექტის წევრ ლინეტ ფრომს განასახიერებს, ლუისი კი - ჰოლივუდის ვარსკვლავ სტივ მაქუინს.

მათ გარდა ტარანტინომ სხვადასხვა როლებზე ლიუკ პერი, ემილ ჰირში, კლიფტონ კოლინსი და კიტ ჯეფერსონი დაამტკიცა.

ზემოთხსენებული მსახიობების გარდა, ერთხელ ჰოლივუდში ვიხილავთ - კურტ რასელს, მარგო რობის, ტიმ როთსა და მაიკლ მადსენს.

ფილმთან დაკავშირებით ბევრი დეტალი ჯერ გახმაურებული არ არის, თუმცა წინასწარი ინფორმაციით ის მენსონის კრიმინალური ოჯახის შესახებ იქნება და სიუჟტი 1969 წელს განვითარდება. ეს სწორედ ის წელია, როდესაც "მენსონის ოჯახის" ლიდერმა ჩარლზ მენსონმა თავის მიმდევრებს უბრძანა, რომ ლოს-ანჟელესის გარეუბანში მდებარე სახლისთვის შეეტიათ.

მენსონის დავალებით სასტიკად მოკლედ სახლის მცხოვრებლები, მათ შორის იყო მსახიობი შერონ ტეიტი, რეჟისორ რომან პოლანსკის ორსული ცოლი. ტეიტის როლს მარგო რობი შეასრულებს.

ტარანტინომ ერთ-ერთ ინტერვიუში ფილმის შესახებ ისაუბრა და თქვა, რომ ის სტილითა და ხარისხით ისეთივე იქნება, როგორიც Pulp Fiction.

"ეს იქნება ამბავი 1969 წლის ჰოლივუდზე, იმაზე თუ როგორ იცვლებოდა კინოსამყარო, როგორ იცვლებოდა ჰოლივუდი ყოველ დღე, ყველა ქუჩიდან და ყველა დასახლებიდან. ასევე, მსურს ვთქვა, რომ ლეონარდოსა და ბრედის დუეტი პოლ ნიუმენისა და რობერტ რედფორდის შემდეგ ყველაზე საინტერესო და დინამიური დუეტი იქნება", - ამბობს რეჟისორი.

ფილმის შესახებ კომენტარი Sony-ის წარმომადგენელმაც გააკეთა და აღნიშნა, რომ ეს იყო საუკეთესო სცენარი, რომელიც ოდესმე წაუკითხავს.

ფილმის გამოსვლის თარიღად 2019 წლის 9 აგვისტო სახელდება. ზუსტად 50 წლის შემდეგ, რაც მენსონის ოჯახმა სასტიკად აწამა და მოკლა შერონ ტეიტი და მისი სტუმრები