მართლმადიდებელ მშობელთა კავშირის წევრი, მამა დავით ისაკაძე, რომელიც ამბობს, რომ საპატრიარქოს წარმოადგენს, ზაზა სარალიძის მხარდამჭერ აქციას ამაზრზენს უწოდებს. მსგავსი შინაარსის ვიდეოჩანაწერს ტელეკომპანია რუსთავი 2 ავრცელებს.

"ამაზრზენი აქცია, სამარცხვინო აქცია, რომელმაც ფაქტიურად, ყველა შეგვძრა თავისი სიმახინჯით, ფორმით, რადგანაც ადამიანის პიროვნულ ტრაგედიას ფაშისტური ნაციონალური პარტია იყენებს თავისი პოლიტიკური მიზნების განსახორციელებლად. არანაირი გულშემატკივრომა არ აქვთ ამ ადამიანების, არამედ, პირიქით, მათ იყენებენ თავიანთი ბინძური საქმეების ასაღორძინებლად, რომელსაც ისინი ცხრა წლის მანძილზე საქართველოში იყენებენ", - განაცხადა მამა დავით ისაკაძემ.

მისი თქმით, აქციაზე გაჟღერებული მოთხოვნების მიზანია რევოლუცია, რასაც "ქართველი ხალხი აღარ დაუშვებს".

მართლმადიდებელ მშობელთა კავშირის წევრები, რომლებიც ამბობენ, რომ საპატრიარქოს წარმოადგენენ გუშინ, პირველ ივნისს თავისუფლების მოედანზე იყვნენ შეკრებილები. ისინი აცხადებდნენ, რომ მწუხარებას უცხადებდნენ ზაზა სარალიძეს, თუმცა აქციებს მაინც არ უერთდებიან.

"ანერვიულებულ მამას იყენებენ. ესენი [ნაციონალები] ხო ამაში დახელოვნებული მზაკვრები არიან. ვარდების რევოლუციის დროს რა ქნეს - მოატყუეს მთელი ქვეყანა", - განაცხადა მმკ-ს კიდევ ერთმა წევრმა.

თბილისში აქცია #ნუმომკლავ მესამე დღეა იმართება. აქცია მას შემდეგ დაიწყო, რაც თბილისის საქალაქო სასამართლოს გადაწყვეტილებით ხორავას ქუჩაზე მოკლული დავით სარალიძის მკვლელი ვერ დადგინდა. მმკ-ს მიაჩნია, რომ აქცია, რომელსაც ზაზა სარალიძე შვილის მკვლელის დასჯის მოთხოვნით მართავს, ნაციონალური მოძრაობისგან არის მართული.

ამავე თემაზე: