თბილისის საქალაქო სასამართლოში ხორავას ქუჩის საქმეზე ბრალდებული ორივე პირის მიმართ სასჯელი განისაზღვრა.

პირს, რომელიც სასამართლომ ლევან დადუნაშვილის მკვლელობის საქმეში დამნაშავედ ცნო, სასჯელის ზომად 14-წლიანი პატიმრობა განესაზღვრა. ხოლო პირს, რომელსაც თავდაპირველად ბრალად ედებოდა დავით სარალიძის მკვლელობა და 31 მაისს გამართულ სასამართლო სხდომაზე ბრალი განრახ მკვლელობიდან განზრახ მკვლელობის მცდელობით გადაუკვალიფიცირდა, სასჯელის ზომად 13-წლიანი პატიმრობა განესაზღვრა. იმის გამო, რომ ბრალდებულები არასრულწლოვნები არიან, მათ გათვალისწინებული სასჯელი 1/4-ით უმცირდებათ. შესაბამისად, განზრახ მკვლელობაში მსჯავრდებულს სასჯელის სახით 10 წელი და 6 თვე, ხოლო მკვლელობის მცდელობაში ბრალდებულს 9 წელი და 9 თვე განესაზღვრა.

გუშინ, 31 მაისს თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

საგანგებო ბრიფინგზე, მთავარმა პროკურორმა, ირაკლი შოთაძემ განაცხადა, რომ სასამართლოს განაჩენს არ იზიარებს და პროკურატურა მას გაასაჩივრებს. პროკურატურა გეგმავს საქმეში შვეიცარიელი ექსპერტები და უცხოელი, ცნობილი პროკურორები ჩართონ. ამ განცხადების გავრცელებიდან რამდენიმე საათში შოთაძე გადადგა.

პარლამენტის თავმდჯომარემ, ირაკლი კობახიძემ განაცხადა, რომ საქმეზე საპარლამენტო საგამოძიებო კომისია შეიქმნება. ეს არის პირველი შემთხვევა, როდესაც სისხლის სამართლის დაუსრულებელ საქმეზე საპარლამენტო საგამოძიებო კომისია იქმნება.