მთავარმა პროკურორმა, ირაკლი შოთაძემ საგანგებო ბრიფინგზე განაცხადა, რომ ხორავას ქუჩის საქმეში არსებული დანა დაზიანებული არაა.

რამდენიმე დღის წინ, ერთ-ერთი ბრალდებულის მიერ მოწვეულმა დამოუკიდებელმა ექსპერტმა, მაია ნიკოლეიშვილმა განაცხადა, რომ საქმეში არსებული ერთ-ერთი დანა მას დაზიანებული გადასცეს. შოთა ამბობს, რომ ეს სიცრუეა.

მთავარმა პროკურორმა აღნიშნა, რომ მოპოვებული მტკიცებულებებითა და ჩატარებული ყველა საგამოძიებო მოქმედებებით არ დასტურდება, რომ დანაშაულში ორი დანის გარდა სხვა იარაღიც არსებობდა.

შოთაძემ აღნიშნა, რომ ადგილიდან ამოღებულია ერთი დანა, რომელიც დადგენილია, რომ ეკუთვნოდა ერთ-ერთ ბრალდებულს. ამ დანაზე ამოღებულია როგორც გარდაცვლილის ისე ბრალდებულის სისხლი. საგამოძიებო ექსპერიმენტითა და ერთ-ერთი მოწმის ჩვენებით ამოღებულია მკვლელობის მეორე იარაღი, გადამალული მეორე დანა. ამ დანაზე ამოსულია ერთ-ერთი ბრალდებულის დნმ და ორივე გარდაცვლილის დნმ.

ბრიფინგზე შოთაძემ განაცხადა, რომ სასამართლოს განაჩენს არ იზიარებს და პროკურატურა მას გაასაჩივრებს. პროკურატურა გეგმავს საქმეში შვეიცარიელი ექსპერტები და უცხოელი, ცნობილი პროკურორები ჩართონ.

თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.