უმრავლესობის დეპუტატი, გია ვოლსკი მიიჩნევს, რომ ხორავას ქუჩის საქმეზე დროებითი საგამოძიებო კომისიის შექმნით საკითხი პოლიტიკურ ჭრილში გადავა. მისი თქმით, თემას ბიურო მას შემდეგ უნდა დაუბრუნდეს, რაც გადაწყვეტილებას სააპელაციო სასამართლოც გამოიტანს.

ამ განცხადებას ელენე ხოშტარიას რეპლიკა მოჰყვა "დაგვემხობა თავზე", რაზეც ვოლსკიმ უპასუხა:

"დაგვემხობა თავზე მართლა, არსებობს სასამართლო და ხომ არ შეიძლება ეს თემა დაიკარგოს და დღის წესრიგიოდან მოიხსნას და პასუხის არ გაეცეს გინდა ბატონ ზაზას და გინდა სხვა ადამიანს".

ვოლსკმა კიდევ ერთხელ განაცხადა, რომ სასამართლო პროცესის დასრულებას უნდა დაელოდნონ.

"არის სასამართლო, სასამართლოს პროცესი მიმდინარეობს. ნებისმიერი კომისია და ნებისმიერი განცხადებები ცუდ მდგომარეობაში გვაყენებს. სასამართლოს ვენდობით თუ არ ვენდობით - არის სასამართლო".

პარლამენტის ბიუროს სხდომაზე საგამოძიებო კომისიის შექმნის საკითხი ევროპულმა საქართველომ დააყენა. ჯერ უცნობია რა გადაწყვეტილება მიიღება ამ საკითხთან დაკავშირებით. კომისიის შექმნას ეთანხმება ქართული ოცნების დეპუტატი, რომან კაკულია.

თბილისის საქალაქო სასამართლომ ხორავას ქუჩის საქმეზე ერთი ბრალდებული სარალიძის ნაწილში გაამართლა, ხოლო მეორე ბრალდებულს სარალაძის ნაწილში მუხლი შეუცვალეს. კერძოდ, მუხლი განზრახ მკვლელობიდან მკვლელობის მცდელობად გადაკვალიფიცირდა.

დავით სარალიძის მკვლელობაში ბრალდებული გამოძიებას არ ჰყავს და დაკავებულს ედავებიან მხოლოდ განზრახ მკვლელობის მცდელობას.

პროკურორომა, მარიამ გოგოხიამ განაცხადა, რომ განაჩენს სააპელაციო სასამართლოში გაასაჩივრებს.