IRI-ის კვლევის მიხედვით, გამოკითხულთა 55 პროცენტს საქართველოს ფინანსთა მინისტრის მამუკა ბახტაძის სახელი არ სმენია. მინისტრის მუშაობა გამოკითხულთა მხოლოდ 9 პროცენტისთვის არის მოსაწონი, 22 პროცენტი კი ბახტაძის მუშაობას უარყოფითად აფასებს.

ფოტო: IRI

პოლიტიკოსებს შორის ყველაზე ყველაზე მაღალი რეიტინგი ევროპული საქართველოს ლიდერს დავით ბაქრაძეს აქვს 53 პროცენტით, მეორე ადგილზეა საქართველოს პრეზიდენტი გიორგი მარგველაშვილი 52%-ით, ხოლო მესამე ადგილზეა კახა კალაძე - 50%-ით.

NDI-ს 2018 წლის კვლევის მიხედვით, მოსახლეობის 43 პროცენტს მამუკა ბახტაძის შესახებ არ სმენია. ასევე, მოსახლეობის 5 პროცენტს მის მიმართ უარყოფითი დამოკიდებულება აქვს, ხოლო 9 პროცენტს დადებითი.

მინისტრად მამუკა ბახტაძის დანიშვნის შემდეგ სოციალურ ქსელებში მისი ფეისბუქპოსტების, ფეისბუქგვერდისა და ინსტაგრამზე განთავსებული ფოტოების რეკლამები გავრცელდა. მინისტრი პოსტებს სოციალურ ქსელში მუდმივად არეკლამებს.

საქართველოს ფინანსთა სამინისტროს მიერ On.ge-სთვის მიწოდებული ინფორმაციის მიხედვით, ფინანსთა მინისტრის, მამუკა ბახტაძის გვერდების სოციალურ ქსელებში რეკლამისთვის ბიუჯეტიდან თანხა არ იხარჯება.

უწყებას On.ge-სთვის არ უპასუხია ხარჯავს თუ არა მინისტრი პირად თანხებს სოციალურ ქსელებში რეკლამაზე და ამისთვის დამატებითი წერილის მიწერა ითხოვა.