პრეზიდენტის საპარლამენტო მდივნის, ანა ნაცვლიშვილის განმარტებით, რაც უფრო გრძელდება გამოძიება, კითხვები უფრო მრავლდება.

პრეზიდენტის საპარლამენტო მდივანი, ანა ნაცვლიშვილი და მრჩეველი ადამიანის უფლებების საკითხებში კახა კოჟორიძე ხორავას ქუჩაზე მოკლული დავით სარალიძის მამას, ზაზა სარალიძეს შეხვდნენ.

"იმდენად ბევრი კითხვაა დაგროვილი, რომ ჩვენ ბუნებრივია, ამ საქმეს მივადევნებთ ძალიან აქტიურად თვალს, შევხვდებით ყველა ჩართულ მხარეს და მოვისმენთ ყველა მოსაზრებას და პასუხებს იმ კითხვებზე, რომლებზეც ამ ეტაპისთვისაც კი დამაჯერებელი პასუხები გაცემული არ არის", - აღნიშნა ნაცვლიშვილმა.

ხორავას ქუჩის საქმე

პირველ დეკემბერს, თბილისში, ხორავას ქუჩაზე, არასრულწლოვნებს შორის მომხდარი ჩხუბის დროს ცივი იარაღით დაჭრილი ორი მოზარდი გარდაიცვალა. ფაქტზე შინაგან საქმეთა სამინისტრომ გამოძიება განზრახ მკვლელობის მუხლით დაიწყო. მკვლელობის ბრალდებით დაკავებული ორი არასრულწლოვანი.

მოკლული დავით სარალიძის მამა, ზაზა სარალიძე ამბობს, რომ მკვლელობაში სხვა პირების ბრალეულობაც იკვეთება. სხვა პირების მონაწილეობაზე მიუთითებენ ბრალდებულებიც.

პროკურატურის განცხადებით, საქმეზე შეკრებილი მტკიცებულებებით, არ არსებობს იმის სტანდარტი, რომ გარდა უკვე დაკავებული ორი ბრალდებულისა, დანაშაული სხვებმაც ჩაიდინეს.

ერთ-ერთი ბრალდებულის ოჯახში მიერ მოწვეული დამოუკიდებელი ექსპერტის, მაია ნიკოლეიშვილის დასკვნაში წერია, რომ ხორავას ქუჩაზე მოკლულ ორ მოზარდს ჭრილობები დანის გარდა, სხვა ბასრი საგნებითაც ჰქონდათ მიყენებული და შესაძლოა, ყოფილიყო მაკრატელი.

პროკურატურამ მკვლელობის საქმეზე მასალები გაასაჯაროვა და განაცხადა, რომ შემთხვევის ადგილიდან მხოლოდ სამედიცინო მაკრატელი ამოიღეს. უწყების ცნობით, მათ დაადგინეს, რომ ეს მაკრატელი ადგილზე მისულ სასწრაფო სამედიცინო დახმარების ბრიგადას ეკუთვნოდა, რომელთაც დარჩათ ეს ნივთი

გაიგეთ მეტი: