"გესალმებით თბილისიდან, ქალაქიდან, სადაც 2 კვირის წინ კლუბებში მშვიდობიან მოცეკვავეებს საცეკვაო მოედნები წაართვეს, ქალაქიდან სადაც უთანასწორო გარემოსთან საბრძოლველად ყველა ერთად დავდექით, ქალაქიდან, სადაც ცვლილებები გაურდაუვალია, გესალმებით ჩვენი საცეკვაო მოედნიდან", - BASSIANI დღევანდელ რეივ-აქციასთან და სამომავლო გეგმებთან დაკავშრებით განცხადებას ავრცელებს და 5 მოთხოვნას აყენებს.

კლუბის განცხადებით, ეს არის ბრძოლა არამხოლოდ კონკრეტული სივრცეების, არამედ თავისუფლებისა და თანასწორობის და ყველა იმ ერთობლივი მონაპოვარის წინააღმდეგ, რომლის გარშემოც ათასობით ადამიანია გაერთანებული. მათივე თქმით, არ აქვთ ილუზია, რომ ცვლილებები ერთი ან ორი აქციით მიიღწევა და მუდმივი ბრძოლაა საჭირო:

"დღევანდელი აქცია საკლუბო სცენისა და საზოგადოების ერთიანობის მანიფესტაციაა, სადაც მცირე გამარჯვებას აღვნიშნავთ, თუმცა არ გვავიწყდება მძიმე პრობლემები, რომლის წინაშეც პირისპირ აღმოვჩნდით, არ გვავიწყდება ტკივილი რომელიც ყველა ჩვენგანს მოგვაყენეს."

მოთხოვნები:

  1. არაუგვიანეს საგაზაფხულო სესიისა შეიცვალოს რეპრესიული ნარკოპოლიტიკა, რომელიც ზრუნვასა და პრევენციულ მიდგომებზე იქნება დაფუძნებული;
  2. შეწყდეს მიმდინარე უსამართლო ადმინისტრაციული დევნა "შავი პარასკევის" ღამეს დაკავებულთა მიმართ;
  3. დასრულდეს პოლიციის მხრიდან ჩაგვრა, ჩვენ მზრუნველ სახელმწიფოში გვინდა თანაცხოვრება;
  4. შესაბამისი ორგანოების მხრიდან დაიწყოს კლუბების გარეთ მომხდარ ყველა დაფიქსირებულ დარღვევაზე დროული რეაგირება და გამოძიება;
  5. შეწყდეს საკლუბო სცენის დემონიზირება და დისკრედიტაცია. ამ პროცესში სხვადასხვა ინსტიტუტუციებმა მნიშნვნელოვანი როლი უნდა შეასრულონ და მხარი დაუჭიროს ჩვენს სფეროს.

კლუბის განცხადებით, დალუქული კარის გახსნა არ ნიშნავს ღამის კლუბის გახსნას. მათივე თქმით, ეს ნიშნავს კარის გაღებას საზოგადოებრივი ჯგუფებისთვის და ყველა ადამიანისთვის, ვინც მზადაა საერთო გამოწვევებისა და პრობლემების წინააღმდეგ საბრძოლველად.

დღეს, 27 მაისს ევროპის მოედანზე დაგეგმილი საპროტესტო რეივ-აქცია BASSIAN-ზე გაიმართა. ორგანიზატორების განცხადებით, აქციის კარი ღია იყო ყველასთვის. აქციაზე მედიას მხოლოდ რამდენიმე წუთით და კონკრეტული სივრცეებიდან მისცეს გადაღების უფლება.