საქართველოს მართლმადიდებელი ეკლესიის საპატრიარქო თავის განცხადებაში, რაც დღეს, 24 მაისს გავრცელდა, წერს, რომ ეკლესია ქრისტეს სხეულია და იგი არ შეიძლება იყოს პოლიტიკასთან დაკავშირებული:

"არც პრორუსულთან და არც - პროდასავლურთან".

საპატრიარქო საქართველოში მყოფ იმ საერთაშორისო ორგანიზაციებს მიმართავს, რომლებიც დასავლური ღირებულებების გავრცელებას უწყობენ ხელს:

"დაანახეთ საზოგადოებას, რომ ევროპული დემოკრატია არ არის ხალხის უდიდესი უმრავლესობის აზროვნების წესის და მათი რელიგიური გრძნობების უგულებელყოფა, რათა ჩვენს მოქალაქეებს არ შეექმნათ არასწორი წარმოდგენა და განწყობები".

საპატრიარქოს მაგალითად მოჰყავს გიორგი გაბუნიას გადაცემა არჩევანი, რომლის 22 მაისის თემა იყო "ცენზურის საფრთხე" და ახალი საკანონმდებლო ცვლილება, "რელიგიური გრძნობების შეურაცხმყოფელი ნაწარმოების" გავრცელებაზე. წამყვანს თვალსაჩინოებისთვის სტუდიაში მიტანილი ჰქონდა მხატვარ ლია უკლებას ნახატი "თვითმკვლელი ღვთისმშობელი", რომელსაც სათამაშო პისტოლეტი უჭირავს.

საპატრიარქომ სასულიერო პირებს მოუწოდა, შეწყვიტონ ყოველგვარი ურთიერთობა რუსთავი 2-თან, არ მისცენ ინტერვიუ და არ მიიღონ მათ არცერთ გადაცემაში მონაწილეობა.