სახალხო დამცველი აცხადებს, რომ დევნილთა სამინისტრომ ერთ-ერთ დევნილ პირს მატერიალური ზიანი დევნილის სტატუსის აღდგენის შემდეგ არ აუნაზღაურა, რაც გამოწვეულია ადმინისტრაციული ორგანოს მიერ კანონით დაკისრებული ვალდებულების შეუსრულებლობით.

ომბუდსმენმა ოკუპირებული ტერიტორიებიდან იძულებით გადაადგილებულ პირთა, ლტოლვილთა და განსახლების მინისტრს რეკომენდაციით 18 ივლისს მიმართა რათა იძულებით გადაადგილებულ პირს აუნაზღაურდეს 2008-2013 წლებში მიუღებელი დევნილთა შემწეობა, სადავო პერიოდში დევნილთათვის კანონით გათვალისწინებული შემწეობის ოდენობით:

"სახალხო დამცველმა შეისწავლა იძულებით გადაადგილებული პირის საქმე, რომელსაც 2008–2013 წლებში არ ერიცხებოდა დევნილის შემწეობა, ვინაიდან, არ ჰქონდა გავლილი სამინისტროს მიერ წინასწარ გამოცხადებულ ვადაში დევნილთა რეგისტრაცია. რეგისტრაცია მან მოგვიანებით, 2013 წლის თებერვალში გაიარა, რითაც აღმოიფხვრა შემწეობის დარიცხვის შეჩერების საფუძველი. მართალია სამინისტრომ დევნილის შემწეობა განუახლა, თუმცა არ აუნაზღაურებია განვლილი პერიოდისათვის მიუღებელი დევნილთა შემწეობა, მიუხედავად იმისა, რომ 2008–2013 წლებში მოქმედი კანონის მიხედვით, შეჩერებული დევნილთა შემწეობა მიმდინარე საბიუჯეტო წლის ფარგლებში უნდა ანაზღაურებულიყო".

ომბუდსმენის განცხადებით, დევნილს უფლება აქვს მიიღოს დევნილთა შემწეობა, რომელიც წარმოადგენს დევნილის სტატუსიდან გამომდინარე, კანონმდებლობით დადგენილ ყოველთვიურ გასაცემელს. ის ყოველთვიურად გაიცემა იმ პირებზე, ვისაც მინიჭებული აქვთ დევნილის სტატუსი, თუ არ არსებობს მისი დარიცხვის შეჩერების ან შეწყვეტის საფუძვლები. შეჩერებული დევნილის სტატუსი და დევნილთა შემწეობა აღდგება შესაბამისი საფუძვლის აღმოფხვრის შემთხვევაში.