მერილ სტრიპი, ოპრა უინფრი, ნატალი პორტმანი, რიზ უიზერსპუნი, ჩედვიკ ბოსმანი, რაიან რეინოლდსი, ემი შუმერი, ტენდი ნიუტონი, ნიკოლ კიდმანი - ეს არასრული ჩამონათვალია იმ 140 მსახიობის, პროდიუსერის თუ შოუ-ბიზნესში მომუშავე ადამიანის, რომლებმაც მსოფლიოს სხვადასხვა სახელმწიფოს ლიდერებს ღია წერილი გაუგზავნეს.

"ისტორიული ცვლილებები ქალებისთვის" - ამ კამპანიის ფარგლებში, წერილს ხელი ჰოლივუდელების გარდა, ჟურნალისტებმა და ყოფილმა პოლიტიკოსებმაც მოაწერეს.

წერილში აღნიშნულია, რომ მსოფლიოში 130 მილიონი გოგო განათლების გარეშე რჩება, მილიარდზე მეტს კი ბანკის ანგარიში არ აქვს. ხელმომწერები ხაზს უსვამენ იმასაც, რომ ყოველდღიურად 39 ათასი არასრულწოვანი დგება იძულებითი ქორწინების საფრთხის ქვეშ. გარდა ამისა, აღნიშნულია, რომ მსოფლიოს ყველა წერტილში, ერთი და იგივე სამუშაოსთვის ქალებს იმაზე გაცილებით ნაკლებს უხდიან, ვიდრე კაცებს.

"მსოფლიოში არ არსებობს ადგილი, სადაც ქალებს ისეთივე შესაძლებლობები ექნებათ, როგორიც კაცებს. თქვენ გაქვთ ძალა, შესაძლებლობა, რომ ეს შეცვალოთ. თქვენ გაქვთ ძალა, რომ წლევანდელი წელი იყოს ისტორიული ცვლილებების წელი ქალებისთვის", - წერია განცხადებაში.