ბიზნესომბუდსმენ ირაკლი ლექვინაძის განცხადებით, კლუბ ბასიანსა და კაფე გალერის საქმეში ჩართული არ არის და მისთვის მისაღებია საფუძველი, რომლის გამოც შინაგან საქმეთა სამინისტრო კლუბებში შევიდა. ამის შესახებ მან On.ge-ს განუცხადა.

მანამდე ლექვინაძე ნეტგაზეთთან საუბარში აღნიშნავდა, რომ ბასიანზე სამართალდამცავები ნარკორეალიზაციის საქმეზე შევიდნენ და არა - მათი საქმიანობის შესაჩერებლად.

On.ge-ს კითხვაზე - რატომ აფასებს ის ბასიანის საქმიანობას ნარკობიზნესად - ლექვინაძე პასუხობს:

"ნარკობიზნესს არ დავუჭერთ მხარს არასდროს, იმიტომ რომ კანონგარეშე ბიზნესია. ზოგადად ბასიანი, როგორც კლუბი და ის ბიზნესი, რაც კანონის ჩარჩოში ხდება ბუნებრივია ასეთი ბიზნესი უნდა არსებობდეს და ასეთი ტიპის ბიზნესინტერესებს ჩვენ დავიცავთ, რა თქმა უნდა. საფუძველი, რის გამოც შევიდნენ კლუბში ეს ჩვენთვის გასაგებია".

მისი თქმით, ახლა, როცა გამოძიება ჯერ დამთავრებული არ არის, უჭირს საუბარი სწორად წარიმართა თუ არა ამ საქმეზე პროცესები.

"მიმდინარეობს საგამოძიებო სამუშაოები, რომელიც ითხოვს გარკვეულ დროს. რა თქმა უნდა, რაც მალე გაიხსნება კლუბი ეს არის კარგი. ჩვენ ვფიქრობთ, რომ რაც მალე დაასრულებს საგამოძიებო სამუშაოებს შსს ეს ბიზნესისთვის იქნება მხოლოდ და მხოლოდ კარგი, იმ ბიზნესისთვის, რომელიც რჩება კანონის ჩარჩოში", - ამბობს ის.

ლექვინაძის განმარტებით, საქმეში ჩართული არ არის რადგან, ბიზნესომბუდსმენის აპარატი ბიზნესის წარმომადგენლის მიმართვის საფუძველზე ან რეზონანსულ ფაქტების დროს ერთვება, მაგრამ მხოლოდ მონიტორინგით შემოიფარგლება. ომბუდსმენმა აღნიშნა, რომ პროცესებს თვალს ადევნებს და თუ კლუბები მიმართავენ კანონის ჩარჩოში შეზღუდულ უფლებებზე მათ დახმარებას გაუწევს.

სპეცოპერაცია გალერისა და ბასიანზე

11 მაისის ღამეს თბილისის ღამის კლუბებში ბასიანსა და გალერიში სპეცრაზმი ერთდროულად შევიდა. კლუბები დაატოვებინეს ყველა სტუმარს ისე, რომ პირადი ნივთების გამოტანის საშუალებაც არ მისცეს და მიზეზი არ განუმარტეს.

როგორც მინისტრის მოადგილე, ნათია მეზვრიშვილი ამბობდა, ბასიანსა და გალერიში ნარკოტიკული საშუალებები იყიდებოდა და პოლიციის მიერ საგამოძიებო მოქმედებების ჩატარება ლეგიტიმური იყო. მისივე განმარტებით, პოლიცია მოქმედებდა კანონის ჩარჩოებში.

როგორც მოგვიანებით, შს მინისტრმა, გიორგი გახარიამ აღნიშნა, 12 მაისს კლუბებში სპეცოპერაცია ნარკორეალიზატორთა დასაკავებლად არ ჩატარებულა. მისივე თქმით, მათი მიზანი რეალიზატორებსა და კლუბის ინფრასტრუქტურას შორის კავშირის დადგენა იყო.