მთავარი პროკურატურა დავით ახალაიას მიმართ ინტერპოლით ძებნის შეწყვეტასთან დაკავშირებით განმარტავს, რომ აღნიშნული გადაწყვეტილების მიღებისას ინტერპოლის გენერალური სამდივნო 2015 წლის 18 თებერვალს იმ ინსტრუქციებს დაეყრდნო, რომელთა საფუძველზეც ახლებურად რეგულირდება ლტოლვილის სტატუსის მქონე პირების მონაცემთა დამუშავების საკითხები.

პროკურატურის განმარტებით, აღნიშნული ინსტრუქციების მიხედვით, თითოეული წითელი ცირკულარის (red notice request) ან ძებნის გავრცელების (diffusion request) თაობაზე თხოვნა ლტოლვილის სტატუსის მქონე პირის მიმართ უნდა შეფასდეს შემდეგი კრიტერიუმების გათვალისწინებით:

  • დასტურდება თუ არა ფაქტი იმის თაობაზე, რომ პირი ფლობს ლტოლვილის სტატუსს ან იგი წარმოადგენს თავშესაფრის მაძიებელს.
  • დასტურდება თუ არა ფაქტი იმის თაობაზე, რომ პირის მიმართ წითელი ცირკულარის ან ძებნის გავრცელების თხოვნა მიღებულია მისი წარმოშობის სახელმწიფოდან.
  • დასტურდება თუ არა ფაქტი იმის თაობაზე, რომ ლტოლვილის სტატუსის მინიჭება კონკრეტული სახელმწიფოს მიერ არ არის განპირობებული წარმოშობის სახელმწიფოსთან მიმართებაში არსებული პოლიტიკური მოტივებით.

პროკურატურის ცნობით, დავით ახალაიას შემთხვევაში, ინტერპოლის ფაილების კონტროლის კომისიამ მხედველობაში მიიღო ის გარემოება, რომ ძებნილ პირს მინიჭებული ჰქონდა ლტოლვილის სტატუსი და ძებნის შეწყვეტის რეკომენდაციით მიმართა ინტერპოლის გენერალურ სამდივნოს.

პროკურატურა აცხადებს, რომ დავით ახალაიას მიმართ ძებნა შეწყდა არა ინტერპოლის კონსტიტუციის მე-3 მუხლის საფუძველზე, არამედ იმ ფაქტზე დაყრდნობით, რომ დავით ახალაიას ერთ-ერთი სახელმწიფოს მიერ მიენიჭა ლტოლვილის სტატუსი.

პროკურატურის განმარტებით, ის აპირებს საქართველოში, ინტერპოლის ეროვნულ ცენტრალურ ბიუროსთან ერთად, ინტერპოლის რეგულაციების ფარგლებში, ყველა შესაძლებლობას გამოყენებას ინტერპოლის გენერალური სამდივნოს მიერ დღეს არსებული მიდგომის გასაუქმებლად და მიღებული გადაწყვეტილების გასასაჩივრებლად.

კონსტიტუციური უსაფრთხოების დეპარტამენტის ყოფილი უფროსი, დათა ახალაია, ინტერპოლმა ძებნილთა სიიდან ამოიღო. ინფორმაციას ამის შესახებ Facebook-ით ანი ნადარეიშვილი ავრცელებს. ინტერპოლის საიტზე ძებნილთა სიაში ამჟამად დათა ახალაიას სახელი და გვარი არ იძებნება. ფოტოზე ასახულია ინტერპოლის ვებგვერდზე რამდენიმე თვის წინ განთავსებული მონაცემები.

დათა ახალაიას საქართველოში ბრალი რამდენიმე სისხლის სამართლის საქმეზე ჰქონდა წარდგენილი. მის მიმართ გამამტყუნებელი განაჩენიცაა გამოტანილი. ანი ნადარეიშვილის ინფორმაციით, ინტერპოლმა ძებნის შეწყვეტის გადაწყვეტილება იმიტომ მიიღო, რომ ახალაია პოლიტიკური ნიშნით დევნილად მიიჩნია.