იუსტიციის უმაღლესი საბჭოს წევრი და ქუთაისის სააპელაციო სასამართლოს თავმჯდომარი, დიმიტრი გვრიტიშვილი ამბობს, რომ საბჭოს წევრის, ანა დოლიძის შესახებ გაკეთებული განცხადების უარყოფას არ აპირებს.

ანა დოლიძემ დიმიტრი გვრიტიშვილს სასამართლოში უჩივლა. დოლიძე მიიჩნევს, რომ გვრიტიშვილმა მისი პატივი და ღირსება შელახა. თებერვალში გვრიტიშვილი ამბობდა, რომ დოლიძე 2008 წელს რუსულ ორგანიზაციაში მუშაობდა და რუსეთის სასურველ ინფორმაციის აწვდიდა.

"ჩემი პოზიცია, როგორც მოპასუხის, სასამართლოს წარედგინება მას შემდეგ, რაც ჩამბარდება სარჩელი და გავეცნობი მის არგუმენტაციას. ერთი შემიძლია გითხრათ, როგორც გაჟღერდა, მოთხოვნა არის იმ ცნობების უარყოფა, იმ ცნობების მოთხოვნის უარყოფას მე არ დავეთანხმები, აქვე გიცხადებთ, კიდევ ვამბობ, თავს შევიკავებ კონკრეტული არგუმენტაციის წარმოდგენისგან. ყველასთვის ხელმისაწვდომია ჩემი კომენტარი. მე იმ კომენტარს, რა თქმა უნდა, ვეთანხმები", - განაცხადა გვრიტიშვილმა.