იუსტიციის საბჭოს არამოსამართლე წევრმა, ანა დოლიძემ ქუთაისის სააპელაციო სასამართლოს თავმჯდომარეს, დიმიტრი გვრიტიშვილს სასამართლოში უჩივლა. მის უფლებებს საქართველოს ახალგაზრდა იურისტთა ასოციაცია დაიცავს.

"ძალიან მნიშვნელოვანია დადგინდეს ერთხელ და სამუდამოდ კულტურა, რომ საზოგადო მოღვაწემ, განსაკუთრებით ისეთი მნიშვნელობის სტატუსის მქონე პირმა, როგორიც მოსამართლეა, უნდა იცოდეს, რომ ტყუილს აქვს ფასი. ხანდახან რეპუტაციულად ძალიან ძვირი ფასი", - აღნიშნა ანა დოლიძემ რუსთავი 2-თან საუბრისას.

დოლიძე მიიჩნევს, რომ გვრიტიშვილმა მისი პატივი და ღირსება შელახა. საქმე ეხება ქუთაისის სააპელაციო სასამართლოს თავმჯდომარის მიერ სამი თვის წინ გაჟღერებულ ინფორმაციას.

გვრიტიშვილი ამბობდა, რომ დოლიძე 2008 წელს რუსულ ორგანიზაციაში მუშაობდა და რუსეთის სასურველ ინფორმაციის აწვდიდა. დოლიძე კი ამბობს, რომ ინიციატივა სამართლიანობისთვის რუსეთში ჰოლანდიური ორგანიზაციაა და არ აგროვებდნენ საქართველოსთვის საზიანო ფაქტებს.

"მე ვაპირებ, რომ მას ეს დავუდასტურო მტკიცებულებების მეშვეობით სასამართლოში და შესაბამისად, მოვთხოვო ამ ტყუილის უარყოფა საზოგადოებრივი საშუალებებით", - ამბობს დოლიძე.