კულტურის შესახებ კანონში ცვლილებების ინიციატორი, ქართული ოცნების, დეპუტატი ლევან გოგიჩაიშვილი ამბობს, რომ ცვლილებები ცენზურას ან დამატებით შეზღუდვას არ გულისხმობს.

"პირიქით, შემოდის ახალი, სასამართლო სტანდარტი. ცვლილებების თანახმად, შემოქმედებითი ნაწარმოებების გავრცელების აკრძალვა დასაშვებია მხოლოდ სასამართლოს გადაწყვეტილებით, თუ ნაწარმოების გავრცელება სხვათა უფლებებს ლახავს", - განაცხადა ლევან გოგიჩაიშვილმა

მისივე თქმით, ცვლილება არის ტექნიკური სახის, ხდება კონსტიტუციური ნორმის სიტყვა-სიტყვითი გადატანა შესაბამის კანონებში, რადგან ყველა კანონი ახალ კონსტიტუციასთან შესაბამისობასთან უნდა იყოს.

ახალი კანონპროექტით, რომლის ინიციატორი გოგიჩაიშვილის გარდა ეკა ბესელიაც არის, სასამართლოს შემოქმედებითი ნაწარმოების გავრცელების აკრძალვა შეეძლება.

კულტურის შესახებ კანონის ამჟამინდელი რედაქციით შემოქმედებითი ნაწარმოების გავრცელება დაუშვებელია თუ ის ლახავს სხვა ადამიანის უფლებებსა და კანონიერ ინტერესებს, აღვივებს ეროვნულ, ეთნიკურ, რელიგიურ და რასობრივ შუღლს, ქადაგებს ომსა და ძალადობას და პროპაგანდას უწევს პორნოგრაფიას. ინიციატივით, ყველა ამ მიზეზით შემოქმედებითი ნაწარმოების გავრცელების აკრძალვის დასაშვებობას სასამართლო განსაზღვრავს.

კონსტიტუციის ახალი რედაქციის მე-20 მუხლში კი ვკითხულობთ, რომ სასამართლოს გადაწყვეტილებით შემოქმედებითი ნაწარმოების გავრცელების აკრძალვა შესაძლებელია, თუ ის სხვათა უფლებებს ლახავს.

განმარტებით ბარათში ვკითხულობთ, რომ კანონპროექტის მიღების მიზანია საქართველოს მოქმედ კანონმდებლობის საქართველოს კონსტიტუციაში შეტანილ ცვლილებებთან ჰარმონიზება.

გარდა ამისა, ცვლილებები შედის საქართველოს სამოქალაქო საპროცესო კოდექსში. სამოქალაქო საქმეების ჩამონათვალს ემატება შემოქმედებითი ნაწარმოების გავრცელების აკრძალვასთან დაკავშირებული საქმეები, თუ ნაწარმოების გავრცელება ლახავს სხვათა უფლებებს

აღნიშნული ცვლილება ამოქმედდება საქართველოს პრეზიდენტის მომდევნო არჩევნებში არჩეული საქართველოს პრეზიდენტის მიერ ფიცის დადებისთანავე.