თეთრი ხმაურის მოძრაობის ლიდერი, ბექა წიქარიშვილი აქციის ორგანიზატორების იმ ნაწილს გამოეხმაურა, რომელთათვისაც შს მინისტრთან მიღწეული შეთანხმება და აქციის დაშლის გადაწყვეტილება მიუღებელია.

ბექა წიქარიშვილის განცხადებით, მან სწორი გადაწყვეტილება მიიღო.

"ეს იყო სწორი ნაბიჯი, მე დაპირისპირებას ვერ დავუშვებდი", - განაცხადა ბექა წიქარიშვილმა შს მინისტრთან შეხვედრის დაწყებამდე.

შს სამინისტროში გუშინ, აქციაზე დაანონსებული შეხვედრა, შს მინისტრ გიორგი გახარიასა და თხმ-ს ლიდერებს შორის ამ წუთებში მიმდინარეობს. შეხვედრის დაწყებამდე თეთრი ხმაურის მოძრაობამ კონსულტაციების გამართა იმ ორგანიზაციებთან, რომლებიც პარლამენტთან მიმდინარე აქციის ორგანიზატორები თხმ-სთან ერთად იყვნენ.

ბექა წიქარიშვილის თქმით, მათ სჭირდებოდათ უფრო მეტი ლეგიტიმაცია და ნდობა, სწორედ ამიტომ გახდა საჭირო მოლაპარაკებების პროცესში სხვა არასამთავრობოების ჩართვაც.

"ჩვენ ერთ კომპრომისზე უკვე წავედით, ესკალაციის თავიდან აცილების მიზნით და მეტ კომპრომისს ვერ დავუშვებთ", - განაცხადა ბექა წიქარიშვილმა.

ნარკოპოლიტიკის ლიბერალიზაციის მოთხოვნით გამართული აქციის ორგანიზატორების ნაწილისთვის, აქციის დაშლის გადაწყვეტილება მიუღებელი აღმოჩნდა. თხმ-ს ერთ-ერთმა აქტივისტმა დავით სუბელიანმა, ფეისბუქზ სტატუსი გამოაქვეყნა, სადაც დაწერა, რომ თავს გაყიდულად გრძნობს.