15-წლიანი კრიმინალური წარსულის მქონე კაცმა ალპებში, ერთ-ერთ დამსვენებელ ქალსა და მის 3 შვილს ჭრილობები დანით მიაყენა. შემთხვევა დღეს, 10 საათზე მოხდა. ინფორმაციას Telegraph ავრცელებს და განმარტავს, რომ თავდამსხმელი ორსულ მეუღლესთან და ორ შვილთან ერთად დაზარალებულების სიახლოვეს ისვენებდა.

თავდაპირველად ვრცელდებოდა ინფორმაცია, რომ თავდამსხმელი ქალის მოურიდებელმა ჩაცმულობამ გააღიზიანა, თუმცა მოგვიანებით ადგილობრივმა პროკურორმა აღნიშნული უარყო. თავდასხმის რეალური მიზეზი ამ დროისთვის უცნობია.

დაზარალებულთაგან ერთ-ერთს, 8 წლის გოგონას, ფილტვები აქვს გახვრეტილი და საავადმყოფოში იმყოფება. ექიმების მეთვალყურეობის ქვეშ არიან ასევე მისი დედა და 2 დაც. მათი მრავლობითი ტრავმები აღენიშნებათ, თუმცა მდგომარეობა კრიტიკული არ არის.

თავდასხმის მსხვერპლი ოჯახი საფრანგეთის ქალაქ ნანტიდანაა და ალპებში ხშირად ისვენებს ხოლმე. თავად თავდამსხმელი წარმოშობით მაროკოდანაა და პარიზში ცხოვრობს.