ნიუ-იორკის, ტალინის და პარიზის შემდეგ ბერლინში სოლიდარობის მეორე აქცია დაიგეგმა. ორგანიზატორების, Nation Underground-ის განცხადებით, აქციის მონაწილეები გმობენ საქართველოში მომხდარ ძალადობის ფაქტებს:

"თბილისში განვითარებული ბოლოდროინდელი მოვლენების ფონზე, ჩვენ გიწვევთ, რომ შემოგვიერთდეთ ქართველი ახალგაზრდების შევიწროებისა და ძალადობის წინააღმდეგ პროტესტში. ჩვენ ვდგავართ მათ გვერდით ვინც დაზარალდა საქართველოში", - წერენ ორგანიზატორები ფეისბუქზე.

აქცია ჩვენი მშვიდობისთვის პარლამენტთან ხვალ, 13 მაისს, 15 საათზე განახლდება. აქციის მონაწილეთა ნაწილი პარლამენტთან გაშლილ კარვებში ამ დრომდე რჩება.

საპროტესტო აქციები თბილისში მას შემდეგ დაიწყო, რაც 12 მაისს ღამეს კლუბ ბასიანსა და კაფე გალერიში სპეცოპერაცია ჩატარდა. ოფიციალური განცხადებით, ძალოვანებმა ნარკორელიზების ბრალდებით რვა პირი დააკავეს. სპეცოპერაცია დაპირისპირებებისა და მოქალაქეების დაკავების ფონზე მიმდინარეობდა.