საქართველოს პარლამენტის თავმჯდომარის, ირაკლი კობახიძის განმარტებით, შსს-სგან მიღებული ინფორმაციით, კლუბებში შესვლის იყო ლეგიტიმური და ინფორმაციის მიხედვით ჩარევა იყო პროპორციული.

"იყო კონკრეტული ინფორმაცია ნარკოტიკების რეალიზებასთან დაკავშირებით, აქედან გამომდინარე იმოქმედა შინაგან საქმეთა სამინისტრომ. ეს ჩვეულებრივი პრაქტიკაა და სხვა ქვეყნებშიც მომხდარა", - განაცხადა კობახიძემ ტელეკომპანია იმედის ეთერში.

12 მაისს, გვიან ღამით კლუბ ბასიანსა და კაფე გალერიში სპეცოპერაცია ჩატარდა. როგორც შსს ამბობს, მათ რვა ნარკორეალიზატორი დააკავეს, თუმცა როგორც ირკვევა არც ერთი ბრალდებული კლუბის ტერიტორიაზე არ დაუკავებიათ.

შსს-ს საგანგებო ბრიფინგზე განაცხადეს, რომ სპეცოპერაცია იმ დროს დაიწყო, როდესაც კლუბებში ნარკოტიკული საშუალებების გასაღება უნდა მომხდარიყო.

უწყების თქმით, ისინი ბოლო 3 თვის განმავლობაში ინტენსიურ ოპერატიულ-სამძებრო და საგამოძიებო მოქმედებებს ახორციელებდნენ თბილისში მდებარე კლუბებში. მათივე თქმით, ნარკორეალიზატორთა გამოსავლენად კლუბებში არაერთი საკონტროლო შესყიდვა განხორციელდა.

გამოძიება სისხლის სამართლის კოდექსის 260-ე მუხლით მიმდინარეობს, რაც დიდი ოდენობით ნარკოტიკული საშუალების შენახვა-მოხმარება-გასაღებას გულისხმობს.

გაიგეთ მეტი: