ნარკორეალიზების ბრალდებით დაკავებულების ადვოკატებს გაუთქმელობაზე მოაწერინეს ხელი. ამის შესახებ ერთ-ერთი დაკავებულის ადვოკატმა, ირაკლი ჩუტკერაშვილმა ჟურნალისტებს განუცხადა.

"ძალიან დიდი ემოციური ფონი მოჰყვა ამ ყველაფერს. ამ მტკიცებულების გახმაურება გარკვეულწილად დააზარალებს, მათი აზრით, გამოძიებას. ვფიქრობ, რომ ეს ასე არ არის იმიტომ, რომ ხალხმა უნდა იცოდეს, რა მოხდა და როგორ მოხდა," - განაცხადა ადვოკატმა.

ადვოკატი ნინო ლალიაშვილი ამბობს, რომ არც ერთი ბრალდებული კლუბის ტერიტორიაზე არ დაუკავებიათ.

"საქმის მასალები, მიუხედავად იმისა, რომ ბრალის წარდგენა მოხდა, ჯერჯერობით არ გადმოგვეცა. შესაბამისად, რამდენად დასაბუთებული არის პროკურატურის მოთხოვნა, ამ ეტაპზე ამაზე საუბარი, უბრალოდ, შეუძლებელია", - განაცხადა კიდევ ერთმა ადვოკატმა, გიორგი ფანცულაიამ.

12 მაისს, გვიან ღამით კლუბ ბასიანსა და კაფე გალერიში სპეცოპერაცია ჩატარდა. როგორც შსს ამბობს, მათ რვა ნარკორეალიზატორი დააკავეს, თუმცა როგორც ირკვევა არც ერთი ბრალდებული კლუბის ტერიტორიაზე არ დაუკავებიათ.

შსს-ს საგანგებო ბრიფინგზე განაცხადეს, რომ სპეცოპერაცია იმ დროს დაიწყო, როდესაც კლუბებში ნარკოტიკული საშუალებების გასაღება უნდა მომხდარიყო.

უწყების თქმით, ისინი ბოლო 3 თვის განმავლობაში ინტენსიურ ოპერატიულ-სამძებრო და საგამოძიებო მოქმედებებს ახორციელებდნენ თბილისში მდებარე კლუბებში. მათივე თქმით, ნარკორეალიზატორთა გამოსავლენად კლუბებში არაერთი საკონტროლო შესყიდვა განხორციელდა.

გამოძიება სისხლის სამართლის კოდექსის 260-ე მუხლით მიმდინარეობს, რაც დიდი ოდენობით ნარკოტიკული საშუალების შენახვა-მოხმარება-გასაღებას გულისხმობს.