თბილისის მერმა კახა კალაძემ 20-საათიანი დუმილი დაარღვია და კლუბებში ჩატარებული სპეცოპერაციების თემაზე სასაუბროდ ჟურნალისტებს შეხვდა:

"არავის ვთავაზობ შესარიგებელ მატჩს. მე გთავაზობთ, ჩემო მეგობრებო, ჩემი დებო და ძმებო, მე ვიცი, რომ ჩემდამი გააჩნიათ გარკვეული პატივისცემა, რასაც ვაფასებ, მე გთავაზობთ ერთად ვებრძოლოთ ნარკოტრეფიკს, ნარკორეალიზატორებს".

კალაძემ აღნიშნა ისიც, რომ სპეკულირებაა თითქოს 12 მაისის სპეცოპერაცია იქნება დარტყმა ღამის ეკონომიკაზე და კლუბურ მუსიკაზე:

"ვერ დავეთანხმები ამ ადამიანებს. სრული პასუხისმგებლობით ვამბობ, ღამის ეკონომიკა აუცილებლად განვითარდება და კლუბური სცენა, რომელიც არის წარმატებული, აუცილებლად გაგრძელდება. ჩემი მხრიდან იქნება მაქსიმალური ხელშეწყობა. ჩვენ ვამაყობთ იმ წარმატებებით რაც ამ მიმართულებით გააჩნია ჩვენს დედაქალაქს. არავის ვთავაზობ შესარიგებელ მატჩს. ჩვენ დილიდან შეკრებილები ვართ და ვმსჯელობთ. გუნდში დაწყებულია მუშაობა ნარკოპოლიტიკაზე. არსებული არავისთვისაა მისაღები. ეს არის ერთი დიდი პრობლემა".

კალაძის თქმით, აქციის მონაწილეების განცხადება პრემიერის გადადგომის მოთხოვნაზე "ემოციური იყო".

მისივე ცნობით, სპეცოპერაციის შედეგად დაკავებული იყო 8 პირი ნარკორეალიზატორობის ბრალდებით, აქედან 2 არის გათავისუფლებული და პატიმრობაში რჩება 6 ადამიანი. ჟურნალისტის კითხვაზე, თუ რამდენად ადეკვატური იყო სპეცრაზმის შეჭრა ხალხით სავსე კლუბში, კალაძემ თქვა, რომ ფორმა შეიძლება "პოლემიკის საგანი იყოს":

"ყველა ვთანხმდებით, რომ ნარკორელიზატორებს ერთად უნდა ვებრძოლოთ".

12 მაისის პარლამენტთან დაგეგმილი თეთრი ხმაურის მოძრაობის აქცია 15 საათზე დაიწყო და ამ წუთამდე გრძელდება. აქციის მონაწილეები აცხადებენ, რომ ისინი დაშლას არ აპირებენ და რუსთაველის გამზირზე კარვების გაშლას გეგმავენ.

12 მაისს ღამის პირველ საათზე შსს-ს კლუბ ბასიანსა და კაფე გალერიში სპეცოპერაცია დაიწყო. ოფიციალური განცხადებით, ძალოვანებმა ნარკორელიზების ბრალდებით რვა პირი დააკავეს.

დაპირისპირება მოხდა ბასიანთან მოქალაქეებსა და პოლიციას შორის დაპირისპირება მოხდა. პოლიცია ძალის გამოყენებით მოქალაქეების დაშლას ცდილობდა.

ამის შემდეგ სპეცოპერაციის საპროტესტო აქციამ პარლამენტთან გადაინაცვლა, სადაც პოლიციამ, ასევე, მოქალაქეების დარბევა დაიწყო. ადმინისტრაციული წესით დაკავებული 50-მდე ადამიანი გაათავისუფლეს.

შსს-ს განცხადებით, ბოლო 3 თვის განმავლობაში ინტენსიურ ოპერატიულ-სამძებრო და საგამოძიებო მოქმედებებს ახორციელებდნენ თბილისში მდებარე კლუბებში.

უწყების განმარტებით, სპეცოპერაცია იმ დროს დაიწყო, როდესაც კლუბებში ნარკოტიკული საშუალებები უნდა გაესაღებინათ.