ადამიანის უფლებებზე მომუშავე არასამთავრობო ორგანიზაციები 12 მაისს ღამით ჩატარებულ სპეცოპერაციას ეხმიანებიან და ამბობენ, პოლიციის მხრიდან ადგილი ჰქონდა თვითნებურ დაკავებას, შეკრებისთვის ხელშეშლასა და ღირსებისშემლახავ მოპყრობას.

არასამთავრობოები მოითხოვენ, რომ დაუყოვნებლივ დადგეს იმ პირების პასუხისმგებლობის საკითხი, ვინც განახორციელა სპეცოპერაცია. ასევე, დაიწყოს ძალის გადამეტების ფაქტზე გამოძიება და დასჯაზე ორიენტირებული მიდგომების ნაცვლად სახელმწიფომ ნარკოპოლიტიკა სოციალურ ზრუნვაზე ორიენტირებული გახადოს.

როგორც არასამთავრობოების მიერ გავრცელებულ განცხადებაში ვკითხულობთ, კლუბ ბასიანიდან და გალერიდან ადამიანების გამოყვანა ღირსებისშემლახავ პირობებში მოხდა, ხოლო კლუბების მესაკუთრეებსა და ადმინისტრაციას ჩხრეკის პროცესში სრულყოფილი დასწრების შესაძლებლობა არ მიეცათ.

არასამთავრობოები, ასევე, მიიჩნევენ, რომ ღამით ადამიანთა სპონტანური შეკრება კანონის ფარგლებში მიმდინარეობდა და პოლიცია თავად ახდენდა პროვოცირებას:

"პოლიციამ რამდენიმე ადამიანის მიმართ არაპროპორციული ძალის გამოყენების და შეკრების ზოგიერთი ლიდერის დაკავებით, მოახერხა შეკრების მონაწილეების ჯგუფების იზოლაცია, სხვადასხვა ქუჩებზე გაფანტვა და მასშტაბური კორდონით შეკრების ტერიტორიის გაწმენდა."

ხელმომწერი ორგანიზაციები ამბობენ, რომ იზიარებენ ნარკორეალიზაციასთან ბრძოლის მნიშვნელობას და სახელმწიფოს ვალდებულებებს ამ კუთხით, თუმცა ეს პროცესი გავლენიანი დანაშაულებრივი ჯგუფების რეაგირებითა და ჰუმანური პოლიტიკით უნდა დაიწყოს.

განცხადებას ხელს აწერენ შემდეგი ორგანიზაციები:

  • ადამიანის უფლებების სწავლებისა და მონიტორინგის ცენტრი (EMC)
  • კონსტიტუციის 42-ე მუხლი
  • საერთაშორისო გამჭვირვალობა საქართველო (TI)
  • სამართლიანი არჩევნებისა და დემოკრატიის საერთაშორისო საზოგადოება (ISFED)
  • ადამიანის უფლებათა სახლი
  • ფონდი ღია საზოგადოება საქართველო (OSGF)
  • საქართველოს დემოკრატიული ინიციატივა (GDI)
  • საქართველოს ახალგაზრდა იურისტთა ასოციაცია