პარლამენტის სპორტის კომიტეტის თავმჯდომარემ, მიხეილ ყაველაშვილმა განაცხადა, რომ ძიუდოს ყრილობაზე სპორტსმენებმა განცხადება გააკეთეს, კითხვებიც დასვეს, თუმცა პასუხს არ დაელოდნენ და დარბაზი ისე დატოვეს.

მისივე თქმით, ძიუდოს ფედერაციის პრეზიდენტმა, დავით ქევხიშვილმა სპორტსმენების ბრალდებებს მოუსმინა და მათთვის პასუხებიც აქვს.

ძიუდოისტებმა, რომლებიც პრეზიდენტის გადადგომას ითხოვენ, ყრილობა პროტესტის ნიშნად დატოვეს. როგორც მათ განმარტეს, კითხვებზე პასუხი ვერ მიიღეს.

ნაკრების კაპიტანი ვარლამ ლიპარტელიანი ამბობს, რომ ყრილობაზე დასწრების უფლებას სპორტსმენებს არ აძლევდნენ და მხოლოდ თხოვნის შემდეგ გახდა ეს შესაძლებელი. მისივე თქმით, პასუხების მისაღებად მათ ყრილობის დასრულებას უნდა დაელოდონ.

დღეს, 10 მაისს ძიუდოს ფედერაციის რიგგარეშე ყრილობა, ფედერაციის პრეზიდენტის გადაწყვეტილებით, დახურულ ფორმატში მიმდინარეობს.

ძიუდოს ნაკრების რამდენიმე წევრი გუნდის კაპიტან ვარლამ ლიპარტელიანთან ერთად ფედერაციის პრეზიდენტის, დავით ქევხიშვილის გადადგომას ითხოვს. ძიუდოისტები ქევხიშვილის გადადგომის მოთხოვნის მიზეზს, ერთი მხრივ, ნაკრების წარუმატებლობასა და მეორე მხრივ, ფედერაციაში არსებულ მძიმე და უსიამოვნო სიტუაციას უკავშირებენ.

სპორტსმენები აცხადებენ, რომ თუ დავით ქევხიშვილი არ გადადგება, ისინი საერთაშორისო ტურნირებში მონაწილეობას აღარ მიიღებენ. როგორც ქევხიშვილის ამბობს, ის გადადგომას არ აპირებს.

აპრილის ბოლოს ევროპის ჩემპიონატიდან უმედლოდ დაბრუნების შემდეგ ძიუდოს ნაკრების მთავარმა მწვრთნელმა, ირაკლი ცირეკიძემ გუნდი დატოვა, გადადგა მთელი სამწვრთნელო შტაბი.

კულტურისა და სპორტის მინისტრმა, მიხეილ გიორგაძემ თქვა, რომ ფედერაციაში არსებული პრობლემის შესასწავლად სამინისტროს, პარლამენტის სპორტის კომიტეტისა და ოლიმპიური კომიტეტის ერთობლივი კომისია შეიქმნა. მისივე განმარტებით, კომისიამ უკვე გამოითხოვა ფედერაციიდან ინფორმაცია და მისი შესწავლის შემდეგ შედეგები გასაჯაროვდება.