ამერიკის შეერთებული შტატების ფედერალური ავიაციის ადმინისტრაციამ რამდენიმედღიანი აკრძალვის შემდეგ, ავიაკომპანიებს კვლავ მისცა უფლება განახორციელონ ავიარეისები თურქეთიდან აშშ-ს მიმართულებით და პირიქით.

აკრძალვის მოხსნის შემდეგ თურქეთის ავიახაზების პირველი თვითმფრინავი უკვე გაფრინდა ათათურქის აეროპორტიდან ნიუ-იორკის მიმართულებით.

აშშ-ს ფედერაციული ავიაციის ადმინისტრაციამ ყველა ავიაკომპანიას თურქეთის მიმართულებით ფრენების განხორციელება 15 ივლისს, სამხედრო გადატრიალების მცდელობის შემდეგ შეწყვიტა უსაფრთხოების უკიდურესი გაუარესების გამო. ამჟამად თურქეთის აეროპორტებში უსაფრთხოების დონე დადგენილ სტანდარტებს შეესაბამება. შეზღუდვა ეხებოდა ამერიკულ ავიაკომპანიებსაც, თუმცა ამერიკული კომპანიები უკვე რამდენიმე თვეა, ისედაც არ ახორციელებენ რეისებს თურქეთის მიმართულებით.

გადატრიალების მცდელობის შემდგომ თურქეთის მიმართულებით ავიარეისები შეწყვეტილი ჰქონდათ ბრიტანეთის ავიახაზებს, ლუფთანზას და სხვა ევროპულ ავიაკომპანიებს, თუმცა 19 ივლისის მონაცემებით, ავიარეისები ყველამ ჩვეული რეჟიმით აღადგინა.

თურქეთში გადატრიალების მცდელობისას, ამბოხებულმა სამხედროებმა სხვადასხვა სტრატეგიულ ობიექტთან ერთად ხელში აეროპორტებიც ჩაიგდეს, თუმცა, ერდოღანის ხელისუფლებამ მალევე შეძლო კონტროლის ხელში აღება. ამ დროისათვის დაპატიმრებულია ამბოხის მცდელობაში მონაწილე ათასობით პირი.