შინაგან საქმეთა სამინისტრომ, პროსტიტუციისთვის ადგილის გადაცემის ბრალდებით, თბილისში ორი პირი დააკავა. მათ მიმართ წარდგენილი ბრალდება ისჯება ჯარიმით ან 2-დან 4 წლამდე ვადით თავისუფლების აღკვეთით.

შსს-ს ინფორმაციით, დაკავებულები თბილისში, სასტუმროს ტიპის ერთ-ერთ დაწესებულებაში, გარკვეული გასამრჯელოს სანაცვლოდ, პროსტიტუციისთვის ოთახებს სისტემატურად აქირავებდნენ. ფ.ი. აღნიშნული დაწესებულების მფლობელი იყო, ხოლო ი.ქ. ადმინისტრატორად და ბარმენად მუშაობდა.

სამართალდამცველებმა მოწმის სტატუსით 6 პირი გამოკითხეს. უწყების ცნობით, ბრალდებულები ჩადენილ დანაშაულს აღიარებენ.

გამოძიება პროსტიტუციისთვის ადგილის ან საცხოვრებლის გადაცემის ფაქტზე მიმდინარეობს.