შინაგან საქმეთა სამინისტრომ თბილისში, ქსნის ქუჩაზე ერთ-ერთ საცხოვრებელ კორპუსში აღმოჩენილი ხელყუმბარის ფაქტზე გამოძიება დაიწყო.

ჟურნალისტმა, ნათია კუპრაშვილმა ფეისბუქზე დაწერა, რომ მისი საცხოვრებელი კორპუსის სადარბაზოში მეზობელმა ყუმბარა ერთ-ერთი ბინის კართან იპოვა:

"რომ არა ჩვენი მეობელი ზურა, რომელმაც დღეს სკოლაში წამსვლელ ბავშვებს შემთხვევით დაასწრო ადრე ადგომა და სადარბაზოში გასვლა - არ ვიცი რა უბედურება გველოდა. სწორედ მან შეამჩნია მესამე სართულზე კართან ხალიჩაზე ყუმბარა. "კალიცო" მოხსნილი იდო, რომ ვინმეს ფეხი გაეკრა და აფეთქებულიყო", - წერს კუპრაშვილი.

გამოძიება სისხლის სამართლის კოდექსის 236 მუხლის II ნაწილით მიმდინარეობს, რაც ცეცხლსასროლი იარაღის, საბრძოლო მასალის, ფეთქებადი ნივთიერების ან ასაფეთქებელი მოწყობილობის მართლსაწინააღმდეგო შეძენა, შენახვას გულისხმობს.