მას შემდეგ, რაც სომხეთის პარლამენტის უმრავლესობამ, ანუ მმართველმა რესპუბლიკურმა პარტიამ, ნიკოლ პაშინიანის პრემიერობის კანდიდატურას მხარი არ დაუჭირა, საპროტესტო მოძრაობის ლიდერმა რესპუბლიკის მოედანზე შეკრებილ მოქალაქეებს სამოქალაქო დაუმორჩილებლობის აქციების განახლებისკენ მოუწოდა.

"8:15 საათზე ტოტალური გაფიცვა უნდა დაიწყოს, გადაიკეტოს ქუჩები, მეტრო, აეროპორტი, გადაიკეტოს სახელმწიფო და საერთაშორისო მნიშვნელობის გზები და, ზოგადად, ყველაფერი, რისი გადაკეტვის შეიძლება", - მიმართა პაშინიანმა მოქალაქეებს.

მან, ასევე, ყველა თავის მხარდამჭერს საღამოს შვიდ საათზე რესპუბლიკის მოედანზე აქციის მოწყობისკენ მოუწოდა.

პაშინიანმა კიდევ ერთხელ აღნიშნა, რომ ის მოითხოვს, რომ რესპუბლიკურმა პარტიამ მმართველობა "ხალხის კანდიდატს" გადასცეს.

დღეს, პირველ მაისს სომხეთის პარლამენტმა ოპოზიციური მოძრაობისა და ფრაქცია ელკის ლიდერი, ნიკოლ პაშინიანი პრემიერ-მინისტრად არ აირჩია. პაშინიანს მხარი დაუჭირა 45-მა დეპუტატმა, წინააღმდეგი იყო 56.

მანამდე რესპუბლიკურმა პარტიამ, რომელიც სომხეთის პარლამენტის უმრავლესობას წარმოადგენს, განაცხადა, რომ პაშინიანს მხარს არ დაუჭერდა.