სომხეთის ოპოზიციური მოძრაობისა და ფრაქცია ელკის მოძრაობის ლიდერმა, ნიკოლ პაშინიანმა განაცხადა, რომ პრემიერ-მინისტრად მისი არჩევის შემთხვევაში სომხეთში კანონის უზენაესობა იქნება. ინფორმაციას რადიო თავისუფლების სომხური ბიურო ავრცელებს.

მისივე თქმით, საუბარია არა პიროვნებაზე, არამედ იმაზე, რომ პოლიტიკურმა ძალებმა კრიზისიდან ქვეყნის გამოყვანა შეძლონ.

"ხელისუფლების გადანაწილება ერთ-ერთ უმთავრეს პრინციპს წარმოადგენს. არ შეიძლება, რომ ერთი და იგივე პიროვნება იყოს ქვეყნის პრემიერ-მინისტრიც, მოსამართლეც და პროკურორიც. უფრო მეტიც, სწორედ აქედან იწყება პრობლემები".

პაშნიანმა, ასევე, განაცხადა, რომ ის მხარს უჭერს მთიანი ყარაბახის რესპუბლიკასა და მის ხალხს.

სომხეთში ახალ პრემიერ-მინისტრს პარლამენტი პირველ მაისს აირჩევს. ფრაქცია ელკმა განაცხადა, რომ კანდიდატად ნიკოლ პაშინიანს წარადგენს.

სომხეთში მმართველმა რესპუბლიკურმა პარტიამ განაცხადა, რომ პრემიერ-მინისტრობის კანდიდატს არ წარადგენს. თუმცა არ დაუზუსტებია დაუჭერს თუ არა მხარს პაშინიანს.

პაშინიანის მხარდაჭერაზე განაცხადეს ბლოკმა ცარუკიანმა და დაშნაკცუთიუნმა.

ყოფილი პრემიერ-მინისტრი სერჟ სარგსიანი თანამდებობიდან 23 აპრილს, 11-დღიანი საპროტესტო აქციების შემდეგ გადადგა. ამის შემდეგ პრემიერ-მინისტრის მოვალეობის შემსრულებელი კარენ კარაპეტიანი გახდა.

გაიგეთ მეტი: