რუსეთის კომუნიკაციების და კავშირგაბმულობის ზედამხედველობის ფედერალურმა სამსახურმა შესაძლოა, Facebook დაბლოკოს. ამის შესახებ სამსახურის უფროსმა ალექსანდრ ჟაროვმა გაზეთ Известия-სთან საუბარისას განაცხადა.

უკვე მესამე წელია, ზედამხედველობის სამსახური Facebook-სგან რუსეთის უშუალოდ რუსეთის ტერიტორიაზე მოქალაქეების პირადი მონაცემების ლოკალიზებასა და რუსეთში აკრძალული კონტენტის წაშლას მოითხოვს.

"2018 წლის განმავლობაში ჩვენ შევამოწმებთ კომპანიას რამდენიმე პრობლემური მიმართულებით. თუკი არსებული პრობლემური საკითხებიდან რომელიმე არ იქნება აღმოფხვრილი, თავისთავად წარმოიშვება ქსელის დაბლოკვის საკითხი", - თქვა ჟაროვმა.

ამავდროულად, ჟაროვმა განაცხადა, რომ წელს ჩატარებული შემოწმებიდან კომპანია მნიშვნელოვნად აგვიანებს და ვერ ეტევა დათქმულ ვადებში.

2015 წლიდან რუსეთში პერსონალური მონაცემების შესახებ განახლებული კანონი მოქმედებს. კანონი ქვეყანაში მოქმედი ყველა სოციალური ქსელისგან რუსეთის მოქალაქეების პირადი მონაცემების ბაზის განთავსებასა და უშუალოდ რუსეთის ტერიტორიაზე ლოკალიზებას მოითხოვს.

Facebook არ არის პირველი სოციალური ქსელი რუსეთში, რომელსაც პრობლემები შეექმნა. გასულ წლებში იგივე მოთხოვნების შეუსრულებლობის შედეგად დაიბლოკა Linkedin, გასულ კვირას კი - Telegram-ის დაბლოკვის გადაწყვეტილება მიიღეს. გადაწყვეტილების მიუხედავად, რუსეთში Telegram-ის მომხმარებლების 70 პროცენტი კვლავ ახერხებს მესენჯერით სარგებლობას.

პრობლემები აქვს Twitter-საც, თუმცა კომპანია ზედამხედველობის სამსახურის მოთხოვნების შესრულებას დათანხმდა.