საქართველოს შინაგან საქმეთა სამინისტროს ადამიანის უფლებათა დაცვის დეპარტამენტის ხელმძღვანელის, ლონდა თოლორაიას თქმით, ოჯახის წევრები მოძალადეების წინააღმდეგ საჩივრების შეტანისგან თავს იკავებენ. ამის შესახებ მან საქართველოს პარლამენტში გენდერული და თანასწორობის საბჭოს სხდომაზე განაცხადა.

"გამოწვევა არის ასევე ისიც, რომ რიგ შემთხვევებში, ემოციების ჩაცხრომის შემდეგ, პირვანდელი ჩვენების გადათქმა და განცხადების უკან გატანა ხდება", - თქვა ლონდა თოლორაიამ, რომელსაც მიაჩნია, რომ საკანონმდებლო ცვლილებები უნდა გატარდეს.

მისი თქმით, როცა საქმე სასამართლომდე მიდის, არის შემთხვევები, როცა მსხვერპლი კანონით მინიჭებულ უფლებას იყენებს და ოჯახის წევრის წინააღმდეგ ჩვენებას არ აძლევს.

"ჩვენდა სამწუხაროდ, გვქონია ასეთი შემთხვევები, როცა პროკურორი რჩება მტკიცებულებების გარეშე. გამამართლებელი განაჩენების სტატისტიკასაც თუ გადავხედავთ, პროცენტულად საკმაოდ მაღალია ოჯახური დანაშაულის შემთხვევებში გამართლებული პირების რაოდენობა, ოღონდ არა იმიტომ, რომ მას დანაშაული არ ჩაუდენია, არამედ იმიტომ, ოჯახის წევრების ჩვენებების გარდა სხვა მტკიცებულებების მოპოვება შეუძლებელი იყო, ოჯახის წევრებმა კი უარი თქვეს ჩვენების მიცემაზე", - განაცხადა ლონდა თოლორაიამ.