პროკურატურის ცნობით, პატიმართა დამამცირებელი და არაადამიანური მოპყრობის ორგანიზების ბრალდებით, რუსთავის #6 დაწესებულების ყოფილი დირექტორი, დირექტორის ყოფილი მოადგილე და სამართლებრივი რეჟიმის განყოფილების ყოფილი უფროსი დააკავეს.

გამოძიების ვერსიით, 2012 წლამდე პერიოდში, რუსთავის #6 დაწესებულებაში პატიმართა მიმართ არაადამიანურ მოპყრობას სისტემური ხასიათი ჰქონდა.

"2006 წლის აგვისტო-სექტემბერში, დაწესებულების დირექტორმა, მისმა მოადგილემ და სამართლებრივი რეჟიმის განყოფილების უფროსმა, შეიმუშავეს მსჯავრდებულებთან მოპყრობის საკუთარი წესები მათი დასჯის, დაშინების და უსიტყვო მორჩილების მიზნით. განყოფილების თანამშრომლები მსჯავრდებულებს ეპყრობოდნენ დამამცირებლად და არაადამიანურად. პატიმრებს ართმევდნენ პირადი ჰიგიენის ნივთებს, საწოლისთვის განკუთვნილ თეთრეულს, იძულებით აშიშვლებდნენ და მათი ნების საწინააღმდეგოდ შიშველ მდგომარეობაში ამწყვდევდნენ კარცერში, სადაც დაბალი ტემპერატურის მიუხედავად, გაუსაძლის მდგომარეობაში ამყოფებდნენ მრავალი დღის განმავლობაში", - ნათქვამია პროკურატურის განცხადებაში.

დაკავებულ პირებს უკვე წარედგინათ ბრალდება და საგამოძიებო უწყებამ უკვე მიმართა სასამართლოს აღკვეთის ღონისძიების სახით პატიმრობის გამოყენების მოთხოვნით.

გამოძიება გრძელდება საქართველოს სისხლის სამართლის კოდექსის 1443-ე მუხლის მე-2 ნაწილით, რაც მოხელის მიერ სამსახურებრივი მდგომარეობის გამოყენებით, ორი ან მეტი პირის მიმართ, ჯგუფურად, დაკავებული ან სხვაგვარად თავისუფლებაშეზღუდული პირის მიმართ დამცირება, არაადამიანური, პატივისა და ღირსების შემლახავ მდგომარეობაში ჩაყენებას გულისხმობს.