თბილისის სააპელაციო სასამართლომ ცოლის დაჭრისთვის მსჯავრდებულს პატიმრობის ვადა 7 წლით, 16-წლამდე გაუზარდა. ამის შესახებ გადაწყვეტილება სასამართლომ ბრალდების მხარის მიერ თელავის საქალაქო სასამართლოს გადაწყვეტილების საჩივრის განხილვის შემდეგ მიიღო. ამის შესახებ ინფორმაციას პროკურატურა ავრცელებს.

უწყების ინფორმაციით, კაცმა განზრახ მოკვლის მიზნით, განსაკუთრებული სისასტიკით ცოლს, დედის და ორი მცირეწლოვანი შვილის თანდასწრებით მუცლისა და გულმკერდის არეში რამდენჯერმე დაარტყა დანა. ქალი სამედიცინო დახმარების აღმოჩენის შედეგად გადარჩა.

საქმეზე გამოძიება სისხლის სამართლის კოდექსის 19 -111 და 109-ე მუხლებით (განსაკუთრებული სისასტიკით ჩადენილი განზრახ მკვლელობის მცდელობა) მიმდინარეობდა.