ტრანსგენდერი ძალოსანი ლორელ ჰაბარდი თანამეგობრობის თამაშებზე 90+ წონით კატეგორიაში ოქროს მედლის მოგების მთავარი კანდიდატია.

კრიტიკოსები ამბობენ, რომ 40 წლის ზელანდიელი, რომელიც 2014 წლამდე გევინ ჰაბარდის სახელით იყო ცნობილი და საერთაშორისო ტურნირებზე, როგორც კაცი, ისე ასპარეზობდა, ახლა უპირატესობას უსამართლოდ ფლობს.

"მხარს ბევრი არ მიჭერს და უარს აცხადებს, რომ მიმიღოს, თუმცა არიან ადამიანები, რომლებიც ამას აკეთებენ" - აღნიშნა ლორელმა.

2017 წელს, მას შემდეგ, რაც საერთაშორისო ოლიმპიურმა კომიტეტმა იგი, როგორც ქალი აღიარა, ლორელმა მსოფლიოს ჩემპიონატზე ვერცხლის მედალი მოიგო.

ავსტრალიის ძალოსნობის ფედერაციის წარმომადგენლის მაიკლ კილანისთვის ეს ფაქტი კატეგორიულად მიუღებელია.

"ჩვენი პოზიცია პრინციპული და უცვლელია. კვლავაც მიგვაჩნია, რომ ძალოსნობა გენდერულად სპეციფიკური სპორტია, რომელშიც კაცები და ქალები ცალკე უნდა ასპარეზობდნენ. ეს არ არის დაპირისპირება უბრალოდ ინდივიდებს შორის, რომლებსაც ტესტოსტერონის განსხვავებული დონე გააჩნიათ", - განაცხადა კილანმა.

ჰაბარდის თქმით კი, მას რომ სერიოზული უპირატესობა ჰქონდეს, 2017 წელს ოქროს მედალს სწორედ ის მოიპოვებდა.