ქართული ოცნების კიდევ ერთი დეპუტატი, მარნეულის მაჟორიტარი თამაზ ნავერიანი საზოგადოებრივი მაუწყებელის სამეურვეო საბჭოში ნინია კაკაბაძის კანდიდატურის მხარდაჭერისთვის პატიებას ითხოვს.

"ის მძაფრი და სულის შემძვრელი გრძნობა, რაც დამეუფლა ამ ქალბატონის [ნინია კაკაბაძის] ცნობილი განცხადების დაგვიანებით მოსმენის შემდეგ, აუცილებლად იქონიებდა გავლენას ჩემს გადაწყვეტილებაზე კენჭისყრის დროს. საზოგადოებას ვთხოვ, ქრისტიანული სულგრძელობით გაზომოს ჩემი ნაბიჯები და მომიტევოს უნებლიე შეცდომა", - წერს ნავერიანი ფეისბუქის გვერდზე.

თამაზ ნავერიანის თქმით, საპარლამენტო უმცირესობის მხრიდან პროვოკაციულ ქმედებას ჰქონდა ადგილი, რადგან უმრავლესობას სამეურვეო საბჭოს წევრი არასასურველი კანდიდატებიდან უნდა აერჩია:

"ჩვენ ოპონენტს ვერ მივცემთ საშუალებას, წარმოადგინოს სურათი ისე, თითქოს ჩვენთვის მიუღებელია განსხვავებული აზრის არსებობა მაუწყებლის სამეურვეო საბჭოში და ამის გამო ვბლოკავთ მათ მიერ შემოთავაზებულ კანდიდატებს".

მისი თქმით, ნინია კაკაბაძეზე უკეთეს კანდიდატურას "უმცირესობა ვერ/არ წარმოადგენდა" და ნებისმიერი სხვა კანდიდატიც იქნებოდა ზუსტად იმ "ფასეულობათა მატერებელი, რომელიც მიუღებელია საზოგადოების უმრავლესობისათვის".

"როგორც წესი, ეს ადამიანები ღიად უპირისპირდებიან ქართულ ეროვნულ ტრადიციებს და გააჩნიათ მკვეთრად გამოხატული მიუღებლობა მართლმადიდებლური ეკლესიისა და საქართველოს პატრიარქის მიმართ", - წერს ნავერიანი.

ნინია კაკაბაძის კანდიდატურის მხარდაჭერისთვის პატიება ითხოვა განათლების, მეცნიერებისა და კულტურის კომიტეტის თავმჯდომარე, მარიამ ჯაშმა. ის პატიებას ითხოვს იმათგან, ვინც მისი გადაწყვეტილება შეურაცხყოფად მიიღო.