განათლების, მეცნიერებისა და კულტურის კომიტეტის თავმჯდომარე, მარიამ ჯაში საზოგადოებრივი მაუწყებლის სამეურვეო საბჭოში ნინია კაკაბაძის კანდიდატურის მხარდაჭერის გამო პატიებას ითხოვს.

მისი თქმით, ეს გადაწყვეტილება ერთადერთ მიზანს ემსახურებოდა - ოპოზიციის კვოტით გათვალისწინებული კანდიდატის არჩევას.

"20 წელია ვცდილობ ჩემ ქვეყანას და ეკლესიას საქმით დავუმტკიცო სიყვარულიც და პატივისცემაც", - წერს მარიამ ჯაში ფეისბუქის საკუთარ გვერდზე.

ჯაშის განმარტებით, განათლების, მეცნიერებისა და კულტურის სფეროებში ცდილობს, რომ სისტემურ რეფორმებთან ერთად ეკლესია განსაკუთრებული მნიშვნელობით წარმოჩინდეს.

"პარლამენტში არჩევის პირველივე დღეებიდან არ მოვრიდებივარ ერთგვარად ტაბუ-დადებული თემის - სკოლებში რელიგიის ისტორიის სწავლების თუ განათლების, მეცნიერებისა და კულტურის სფეროში ეკლესიასთან უფრო მჭიდრო თანამშრომლობის აუცილებლებლობის წარმოჩინებას, რადგან ეს არის ჩვენი ქვეყნისთვის და ხალხისთვის უაღრესად მნიშვნელოვანი.

და იმ ყველა მასშტაბურ საკითხს შორის, რომელზეც თანამოაზრეებთან და დარგის ექსპერტებთან ერთად ყოველდღიურად ვმუშაობ და რომელიც მალე გახდება ჩვენი საზოგადოებისთვის ცნობილი - ნინია კაკაბაძის არჩევის საკითხი არ ჩამითვლია ესოდენ პრინციპულად", - წერს ჯაში.

კომიტეტის თავმჯდომარე პატიებას ითხოვს იმათგან, ვინც მისი გადაწყვეტილება შეურაცხყოფად მიიღო.

გაიგეთ მეტი: