საქართველოს ინდუსტრიული ჯგუფის გენერალური დირექტორის ზურაბ გელენიძის განცხადებით, ტყიბულის შახტაში ბუნებრივი კატაკლიზმა მოხდა და შემთხვევასთან უსაფრთხოების ნორმების დარღვევას კავშირი არ აქვს.

ზურაბ გელენიძის თქმით, ამ დროისთვის შემთხვევის ადგილზე საგამოძიებო მოქმედებები მიმდინარეობს.

"უსაფრთხოების ნორმები დაცული რომ არ ყოფილიყო გაცილებით მძიმე შედეგი დადგებოდა. აუცილებლად დადგება ადამიანის ან ჯგუფის პასუხისმგებლობის საკითხი თუ ამგვარი გამოიკვეთა. დაველოდოთ გამოძიების დასრულებას", - განუცხადა ზურაბ გელენიძემ ჟურნალისტებს.

ტყიბულის შახტაში მომხდარ უბედურ შემთხვევას 9 მეშახტის სიცოცხლე ემსხვერპლა, დაშავდა 3 ადამიანი. შემთხვევის ადგილზე საგამოძიებო მოქმედებებს ამ დრომდე ატარებს საქართველოს შინაგან საქმეთა სამინისტრო. მინდელის სახელობის შახტაში იმყოფებოდნენ შრომის ინსპექტირების დეპარტამენტის ინსპექტორებიც.

შსს-ს განცხადებით, გამოძიება სისხლის სამართლის კოდექსის 240-ე მუხლის მეორე ნაწილით მიმდინარეობს, რაც სამთო, სამშენებლო ან სხვა სამუშაოების წარმოებისას უსაფრთხოების წესების დარღვევას გულისხმობს. დანაშაული 5 წლამდე თავისუფლების აღკვეთას ითვალისწინებს.