"არანაირ კომპრომისზე არ ვაპირებ წასვლას", - ასე მიმართა სასამართლოს გიორგი გიორგანაშვილმა, იგივე ბახალამ, რომელსაც ახალი ბრალი ორგანიზებული ნარკოდანაშაულისათვის აქვს წაყენებული.

წინა ბრალის მსგავსად, ბახალა არც ამ ბრალდებას აღიარებს. მისი ადვოკატების თქმით, საპროცესო გარიგებას არ დათანხმდებიან.

გამოძიება ბახალას ქვეყანაში დიდი რაოდენობით ნარკოტიკული საშუალებების შემოტანის ორგანიზებაში მონაწილეობას ედავება. შსს-ში ამბობენ, რომ ბახალასთვის და კიდევ სამი პირისთვის ბრალის წაყენებით საქართველოში სუბოტექსის შემცველი 900 აბის შემოტანის საქმე გახსნეს.

"აუცილებლად ვიზამ ყველაფერს, რომ დავასრულო ეს ავადმყოფური სისტემა", - განაცხადა გიორგანაშვილმა.

ბახალა ახლა მსჯავრდებულია და ციხეშია. 23 იანვარს თბილისის საქალაქო სასამართლომ მას სხვა საქმეზე, 0,3726 გრამი ბუპრენორფინის ფლობისთვის 8-წლიანი პატიმრობა მიუსაჯა. მის დაკავებას საზოგადოებრივი პროტესტი მოყვა, რადგან ბახალა ამტკიცებდა, რომ მას ნარკოტიკი სამართალდამცავებმა ჩაუდეს.

შინაგან საქმეთა სამინისტროს განცხადებით, ბახალას ახალი ბრალი სისხლის სამართლის კოდექსის 260-ე და 262-ე მუხლებით წარუდგინეს, რაც გულისხმობს ორგანიზებული ჯგუფების მიერ ნარკოტიკული საშუალებების უკანონო შეძენა-შენახვასა და ქვეყანაში შემოტანას. დანაშაული ითვალისწინებს 20 წლამდე ან უვადო თავისუფლების აღკვეთას.