ქუთაისის საკრებულოს დეპუტატი ქართული ოცნებიდან, ოთარ ლორთქიფანიძე ფეისბუქზე ჰომოფობოიური შინაარსის განცხადებას ავრცელებს. დეპუტატი აღნიშნავს, რომ ჰომოსექსუალებს უფლება არ აქვთ ურთიერთობა ჰქონდეს საპატრიარქოსთან.

ფოტო: ფოტო ლევან ლორთქიფანიძის ფეისბუქიდან

დეპუტატმა ჰომოფობიური შინაარსის წარწერა ფეისბუქმომხმარებლის პოსტის გაზიარებისას დააწერა, რომელიც ტელეკომპანია რუსთავი 2-ის საქმიანობას შეეხებოდა. ლორთქიფანძე On.ge-სთან საუბრისას ამბობს, რომ იზიარებს გაზიარებული პოსტის შინაარსს.

"ჩემი უფლებაა ჩემს პირად ფეისბუქგვერდზე გავაზიარო ის, რაც მე მინდა, მაგრამ ვფიქრობ, რომ ამ გაზიარებულ პოსტში არანაირი ჰომოფობიური განცხადება არ არის. არ მგონია ვინმეს უფლებას ლახავდეს, უბრალოდ, ესაა ჩემი პოზიცია", - ამბობს საკრებულოს დეპუტატი, რომელის გაზიარებულ პოსტში ტელეკომპანია რუსთავი 2-ის კონტექსტში ქათამია ნახსენები.

დეპუტატი ამბობს, რომ გაზიარებულ პოსტში ქათმად მოხსენიებულია ფრინველი და არა - ადამიანი. მას მიაჩნია, რომ სიტყვა ჰომოფობია არ გულისხმობს ვინმეს სექსუალური იდენტობაზე უარყოფით დამოკიდებულებას.

"მე, როგორც ქრისტიანი, მართლმადიდებლური ეკლესიის წევრი ისე გაგცემთ პასუხს. ჩემთვის მიუღებელია იმ ადამიანების ურთიერთობა მსგავსი ფორმით ჩემი საპატრიარქოს, იმ რელიგიის მიმართ, რომელიც უმძიმეს ცოდვად მიიჩნევს ჰომოსექსუალობას და განსხვავებულ ორიენტაციას. მსგავსი ურთიერთობა მიუღებელია პირადად ჩემთვის", - ამბობს ის.

სახალხო დამცველის აპარატის თანასწორობის დეპარტამენტის უფროსი, ქეთი შუბაშვილი On.ge-სთან საუბრისას ამბობს, რომ დეპუატატის ეს გამონათქვამი დისკრიმინაციას ახალისებს.