რუსეთის მიერ აფხაზეთისა და ცხინვალის რეგიონის ოკუპაციამ ეს ადგილები მკვლელობისა და წამების დაუსჯელობის ადგილად აქცია. ამის შესახებ გაეროში საქართველოს მუდმივმა წარმომადგენელმა, კახა იმნაძემ ნიუ-იორკში, გაეროს უშიშროების საბჭოში ღია დებატების დროს თქვა.

მისი თქმით, ამის დასტურია 22 თებერვალს საქართველოს მოქალაქის, არჩილ ტატუნაშვილის ცხინვალის რეგიონში სიკვდილი.

"საოკუპაციო რეჟიმმა გარდაცვლილის ცხედარი ქართულ მხარეს მხოლოდ რამდენიმე დღის წინ გადმოსცა, სამედიცინო ექსპერტიზამ დაადასტურა მისი წამების აშკარა კვალი", - განაცხადა კახა იმნაძემ.

როგორც საგარეო საქმეთა სამინისტროში ამბობენ, კახა იმნაძემ სიტყვით გამოსვლისას, ადამიანის უფლებათა უმაღლესი კომისრის ციტატა მოიყვანა, რომლის შეფასებითაც ეს რეგიონები ადამიანის უფლებათა დარღვევებისთვის ხელსაყრელ შავ ხვრელებად და მსოფლიოში "ერთ-ერთ ყველაზე მიუწვდომელ ადგილებად" აქცია.

გაეროში საქართველოს მუდმივი წარმომადგენლის თქმით, UNOMIG-ის მანდატის იძულებით შეწყვეტამ, რასაც წინ უსწრებდა ეუთოს მისიის საქმიანობის დასრულება, საქართველოს ოკუპირებულ რეგიონებში საერთაშორისო ყოფნის თვალსაზრისით სრული ვაკუუმი შექმნა.