მას შემდეგ, რაც პარლამენტარ გია ჟორჟოლიანის სოციალურ-დემოკრატიული პარტიის წარმომადგენელმა, სანდრო ცაგარელმა სტუდენტური გაერთიანება აუდიტორია 115 დატოვა, მან ყოფილი თანამებრძოლები თსუ-ს თვითმმართველობასთან კავშირში დაადანაშაულა. სანდრო ცაგარელი ამტკიცებს, რომ აუდიტორია 115 დაიშალა, აუდიტორია 115 კი მას განაწყენებულის პოზიციიდან საუბარში ადანაშაულებს და აქტივობებს ჩვეულებრივ განაგრძობს.

აუდიტორია 115-ის უკვე ყოფილი წევრი, სანდრო ცაგარელი On.ge-სთან საუბარში ამბობს, რომ აუდიტორია 115 ფაქტობრივად აღარ არსებობს, რადგან შიდა დაპირისპირებების შედეგად, ბევრმა სტუდენტმა დატოვა მოძრაობა. ის სტუდენტების განზე გადგომის მიზეზად გაერთიანების რამდენიმე წევრის თსუ-ს თვითმმართველობასთან ფარულ შეხვედრებს ასახელებს.

ცაგარელის მტკიცებით, აუდიტორია 115-ში ერთი მცირე ჯგუფი - მწვანე მუშტი და რამდენიმე დაახლოებული სტუდენტისგან შემდგარი 30-40-კაციანი ჯგუფიღაა დარჩენილი:

"ადამიანებმა და ჯგუფებმა დატოვეს ეს მოძრაობა გაუთავებელი კლანური დაპირისპირებების და მსგავსი სიბინძურეების გამო. მოძრაობა გადაიქცა ჩაკეტილ, ეგოისტურ , ხშირ შემთხვევაში მერკანტილისტური იდეებისთვის საბრძოლო ადგილად".

On.ge-ს შეკითხვას, გააძევა თუ არა ის და ჯგუფის კიდევ რამდენიმე წევრი აუდიტორია 115-მა პოლიტიკური კუთვნილების გამო, ცაგარელმა უპასუხა, რომ მისი სოციალ-დემოკრატიულ პარტიასთან ურთიერთობის შესახებ მოძრაობამ თავიდანვე იცოდა და ვერცერთ ფაქტს ვერ დაუსახელებენ, რომ ამან აუდიტორია 115-ს რაიმეში შეუშალა ხელი:

"სოციალ-დემოკრატიულ პარტიასთან ჩემი ურთიერთობები მათ ყოველთვის იცოდნენ მაშინაც , როდესაც ჩემი ინიციატივით შევიკრიბეთ მარტის დასაწყისში, ჯერ ყველანაირ გამოსვლებამდე და საჯარო აქტიურობამდე ადრე. და ვისაც უნდა, რომ ვითომ სუფთა გამოჩნდეს, გადახედოს თავის ურთიერთობებს პაპავასთან, ბურჭულაძესთან, ხუხაშვილთან და ა.შ".

ცაგარელი ამბობს, რომ ის მოძრაობის დაარსების დღიდან უპირისპირდებოდა, როგორც განათლების სამინისტროს, ისე სახელმწიფო უსაფრთხოების სამსახურსაც მაშინ, როდესაც აუდიტორიის წევრების ნაწილი საჯაროდ ერთ განცხადებას აკეთებდა, ფარულად კი ყოფილ რექტორს ხვდებოდა და მასთან ერთად სხვადასხვა გეგმას აწყობდა.

თავად აუდიტორია 115-ის წევრი, ირაკლი კუპრაძე კი ცაგარელის მიერ გავრცელებული ინფორმაციას აუდიტორია 115-ის დაშლასთან დაკავშირებით უარყოფს და ამბობს, რომ ცაგარელი და კიდევ რამდენიმე სტუდენტი სტუდენტურმა მოძრაობამ თავისი რიგებიდან პარტიული ინტერესების გამო გააძევა:

"სტუდენტების უმრავლესობის პროტესტის გამო აუდიტორია დატოვა 10-15-მდე ადამიანმა, რომელთა მიმართაც, მათი პარტიულობისა და პარტიული ინტერესების გატარების გამო, იქამდეც არაერთხელ გამოითქვა უკმაყოფილება. შესაბამისად, ეს ერთგვარად გაძევებული წევრები აპელირებენ იმაზე, რომ თითქოს მათი წასვლით აუდიტორია დაიშალა".

რაც შეეხება გიორგი არობელიძეს, რომელიც ცაგარელმა თსუ-ს თვითმმართველობასთან ფარულ შეხვედრებში დაადანაშაულა, მან კომენტარისგან თავი შეიკავა და განაცხადა, რომ აღნიშნულზე საუბარი არ სურს, რადგან საკითხის ირგვლივ მიმდინარე პროცესები ჭორაობას უფრო დაემსგავსა.

ცაგარელის მტკიცების პარალელურად, რომ აუდიტორია 115 დაიშალა, სტუდენტურმა გაერთიანება აქტივობებს აგრძელებს. აუდიტორია 115-ში დღეს პრესკონფერენციაც გაიმართა, რომელზეც სტუდენტური მოძრაობის წევრებმა სენატის არჩევნებისათვის მომზადებული პროგრამები წარადგინეს.

ირაკლი კუპრაძის განმარტებით, სენატის არჩევნებზე, რომელიც 15 ივლისს გაიმართება, დამატებით 12 წევრს აირჩევენ. მისი თქმით, სწორედ ამ არჩევნებში მონაწილეობისათვის ემზადება სტუდენტური მოძრაობის რამდენიმე წევრიც. ზემოაღნიშნულის გათვალისწინებით, კუპრაძემ განაცხადა, რომ აუდიტორია 115 ჩვეულ რეჟიმში განაგრძობს მუშაობას.