კალაშნიკოვის ბრენდის არასაბრძოლო დანიშნულების მქონე იარაღი თბილისში ისევ გაიყიდება. ამის შესახებ ინფორმაცია დღეს თავად კონცერნის მარკეტინგის დირექტორმა, ვლადიმირ დმიტრიევმა გაავრცელა და განმარტა, რომ უახლოესი 5 წლის განმავლობაში საქართველოში შემოტანილი იარაღის რაოდენობას გაზრდიან კიდეც. ამის შესახებ რადიო თავისუფლება რია ნოვოსტიზე დაყრდნობით იუწყება.

"კონცერნმა წარმატებით განაახლა სამოქალაქო იარაღით საქართველოს უზრუნველყოფა, სადაც 2006 წლის შემდეგ, ფაქტობრივად, ჩვენი იარაღი აღარ იყო წარმოდგენილი. უახლოესი 5 წლის განმავლობაში ჩვენ ვაპირებთ სამოქალაქო იარაღის მიწოდების გაზრდას, ამიტომ საფირმო ბრენდ-ზონის გახსნა დადებითად აისახება გაყიდვების ზრდაზე".

თბილისში კალაშნიკოვის ბრენდის იარაღი მაღაზია კალიბრში გაიყიდება. ეს კალაშნიკოვის მიერ რუსეთის ფარგლებს გარეთ გახსნილი პირველი ბრენდ-ზონა იქნება.

კონცერნში ასევე აცხადებენ, რომ საქართველოში წარმოადგენენ როგორც ტრადიციულ საბრძოლო იარაღს, ისე იმ პროდუქციასაც, რომლის წარმოებასაც კალაშნიკოვისა და ბაიკალის ბრენდების სახელებით აპირებენ.

საქართველოში კალაშნიკოვის მიერ წარმოებული იარაღი 2006 წლიდან დღემდე აღარ იყიდებოდა.