ქალების სექსუალურ შევიწროებაში დადანაშაულებულ ზვიად დევდარიანს არასამთავრობო ორგანიზაცია სიდას აღმასრულებელი დირექტორის უფლებამოსილება შეუწყვიტეს. ორგანიზაციაში აცხადებენ, რომ დევდარიანმა წასვლის შესახებ განცხადებით თავად მიმართა და გამგეობამაც თხოვნა ერთხმად დააკმაყოფილა.

"სიდას გამგეობა გმობს სექსუალურ და ნებისმიერი სხვა სახის შევიწროებასა და ძალადობას და შეშფოთებულია შექმნილი ვითარებით. გამგეობის წევრები სრულად აცნობიერებენ, რომ ძალადობისა და სექსუალური შევიწროების შესაძლო ფაქტები, რაც უკავშირდება სიდას ყოფილ აღმასრულებელ დირექტორს, ჩრდილს აყენებს არა მხოლოდ ორგანიზაციას, არამედ მთლიანად სამოქალაქო სექტორს", წერია სიდას პრესრელიზში.

სამოქალაქო განვითარების სააგენტო (სიდა) პოზიციონირდება როგორც ორგანიზაცია, რომლის მიზანია:

1. სამოქალაქო საზოგადოების ქსელის განვითარება;
2. სიღარიბის დაძლევა;
3. მიგრაციული პროცესების მართვის გაუმჯობესება;
4. სამოქალაქო ინტეგრაცია და ნდობის მშენებლობა.

10-მდე ქალის სექსუალურ შევიწროებაში ზვიად დევდარიანი 17 მარტს დაადანაშაულეს. დევდარიანი, რომელიც საზოგადობრივი მაუწყებლის სამეურვეო საბჭოს წევრობის კანდიდატი იყო, ბრალდებებს უარყოფს. სახალხო დამცველი ნინო ლომჯარია ზვიად დევდარიანთან დაკავშირებით ქალების მონათხრობში სისხლის სამართლის დანაშაულის ნიშნებს ხედავს. რაც შეეხება საგამოძიებო უწყებებს, პროკურატურას რეაგირება მხოლოდ მაშინ ექნება, "თუ ვინმე განცხადებას შემოიტანს, რომელიც კონკრეტულ დანაშაულზე მიუთითებს".