საქართველოს მთავრობასა და ბელარუსის რესპუბლიკის მთავრობას შორის მოქალაქეთა უვიზო მიმოსვლის შესახებ ორმხრივი შეთანხმება გაფორმდა.

დღეს, 22 მარტს ბელარუსის პრეზიდენტის ალექსანდრე ლუკაშენკოს ვიზიტის ფარგლებში, დოკუმენტს ხელი მოაწერეს საქართველოს საგარეო საქმეთა მინისტრმა მიხეილ ჯანელიძემ და ბელარუსის საგარეო საქმეთა მინისტრმა ვლადიმირ მაკეიმ.

უწყების ცნობით, ორმხრივი შეთანხმების გაფორმებამდე, საქართველოსა და ბელარუსს შორის უვიზო მიმოსვლა მრავალმხრივი შეთანხმების საფუძველზე მოქმედებდა.

პრეზიდენტ გიორგი მარგველაშვილის განცხადებით, უვიზო მიმოსვლის შესახებ შეთანხმება კიდევ უფრო დააახლოებს ბელორუსიისა და საქართველოს მოქალაქეებს და განამტკიცებს უკვე არსებულ კავშირებს.

ბელორუსიის პრეზიდენტ ალექსანდრე ლუკაშენკოს ვიზიტის ფარგლებში ასევე ხელი მოეწერა სულ 11 შეთანხმებას სხვადასხვა, მათ შორის სოფლის მეურნეობის, ჯანდაცვის, განათლებისა და კულტურის სფეროებში თანამშრომლობების შესახებ.