მას შემდეგ, რაც კომპანია ცენტრ პოინტის დამფუძნებელს, მაია რჩეულიშვილს ბრალი თანხების მითვისების მუხლით წარუდგინეს და მან პროკურატურა დატოვა, განაცხადა, რომ მისთვის გაუგებარია, რატომ ცნეს ბრალდებულად მაგნოლია ბათუმთან დაკავშირებით, რომელიც პირადად მის საკუთრებაში არსებული შპს-ა და საქმის მიმდინარეობას პოლიტიკურ პროცესებს უკავშირებს:

"920 რეგისტრაცია აქვს გავლილი ხალხს. დიდი ხანია ცხოვრობენ, აქირავებენ და თვეში 500 დოლარი აქვს თითოეულ მაცხოვრებელს ალბათ შემოსავალი. ახლა ალბათ გამოიძიებენ და გამოძიების დროს გაიცვლება დოკუმენტაცია. ბათუმის მაგნოლია არის ჩემი შპს და მეუბნებიან, რომ აღებულია თანხები. ჩემი შპს-დან, რასაკვრივრელია, თუ იყო მოგება, აღებული იქნებოდა თანხები და რასაკვირველია, იქნებოდა მოგება, რადგან მე ვარ დამფუძნებელი".

რჩეულიშვილის ადვოკატის, მამუკა ჭაბაშვილის განმარტებით კი, კომპანიამ აღებული ვალდებულებები შეასრულა, თუმცა ამ ეტაპზე უბრალოდ საკუთრების ფართობებია დასაზუსტებელი:

"ბრალდება ასეთ რამეს ამბობს, რომ წაიღეს თანხები და სად წაიღეს მერე არ ჩანსო, არ მოხმარდა მშენებლობასო და დაზარალდა ხალხიო. მე არ ვიცი, თვალით არ მინახავს ეს მაგნოლია, მაგრამ ქალბატონი მაია რასაც ამბობს, აშენებულია, რეესტრის ამონაწერი აქვს თითოეულ მობინადრესო. რეესტრით არის გაფორმებული, უბრალოდ ფართებია დასაზუსტებელი, მაგრამ ეს იმას არ ნიშნავს, რომ ვალდებულება არ შესრულდა".

პროკურატურამ ცენტრ პოინტის დამფუძნებლის, მაია რჩეულიშვილისა და მისი შვილის, გუკა რჩეულიშვილის წინააღმდეგ, რომელიც ამავე კომპანიის სამეთვალყურეო საბჭოს თავმჯდომარეა, სისხლის სამართლებრივი დევნა დაიწყო. როგორც უწყება აცხადებს, გუკა რჩეულიშვილზე ძებნა გამოცხადდება, მაია რჩეულიშვილის დაპატიმრების მოთხოვნა კი სასამართლომ არ დააკმაყოფილა. სასამართლო ცენტრ პოინტის დამფუძნებლებს ჯგუფურად სხვისი ქონების გაფლანგვას ედავება, საქმე ათეულობით მილიონ ლარს ეხება.