2010 წლიდან, ყოველ 21 მარტს მსოფლიო დაუნის სინდრომის საერთაშორისო დღეს აღნიშნავს. საქართველო წელს მეშვიდედ უერთდება მსოფლიო ინიციატივას.

დაუნის სინდრომი გენეტიკური ცვლილებაა, რა დროსაც ნაყოფის უჯრედებში 46-ის ნაცვლად 47 ქრომოსომა ჩნდება. ათასი ბავშვიდან ერთი სწორედ ამ სინდრომით იბადება. იგი პირველად 1866 წელს მეცნიერმა ჯონ დაუნმა აღწერა. განვითარებულ ქვეყნებში მუდმივად მუშაობენ დაუნის სინდრომის მქონე ადამიანთა მიმართ სტიგმის დაძლევაზე. შედეგად, ისინი იღებენ განათლებას, საქმდებიან და ქმნიან ოჯახებს.

გთავაზობთ დაუნის სინდრომის შესახებ ცნობიერების ასამაღლებლად გადაღებულ რეკლამებს, რომლებიც დღესვე უნდა ნახოთ, რადგან დღეს 21 მარტია.

1. ძვირფასო მომავალო დედა

ვიდეო ორსული ქალის მესიჯით იწყება, რომელიც ბავშვს ელოდება, რომელსაც დაუნის სინდრომი ექნება. მას ამ სინდრომის მატარებელი ბავშვები შემდეგი სიტყვებით მიმართავენ:

"ძვირფასო მომავალო დედა, არ შეგეშინდეს, შენი შვილი ბევრი რამის გაკეთებას შეძლებს. ის ჩაგეხუტება, შენთან გამოიქცევა, ილაპარაკებს და სკოლაში წავა, როგორც ყველა. ის წერას ისწავლის და შენ მოგწერს, როცა შორს იქნება - რადგან ის მოგზაურობასაც შეძლებს. ის მამას დაეხმარება და თავის ველოსიპედს შეაკეთებს.

ის მუშაობასაც შეძლებს და თავისი შემოსავალი ექნება. შემდეგ კი, თავისი ფულით ვახშამზე დაგპატიჟებს. შეიძლება თავისთვის ბინაც იქირავოს და ცალკე გადავიდეს. ხანდახან ეს რთული იქნება, ძალიან რთული, თითქმის შეუძლებელი. მაგრამ, ნუთუ ყველა დედა არ ფიქრობს ამაზე? ძვირფასო მომავალო დედა, შენს შვილს შეუძლია ბედნიერი იყოს - როგორც მე, შენც ბედნიერი იქნები. ხომ ასეა დედა?"

2. როგორ აღმიქვამ?

2 წლის წინ, CoorDown-მა შთამბეჭდავი ვიდეო გადაიღო, რომელშიც ამერიკელი მსახიობი ოლივია უაილდი მონაწილეობს.

ანა-როუზი 19 წლის გოგონაა ნიუ-ჯერსიდან, ის კოლეჯის სტუდენტია და ასევე ფიზიკური თერაპიის ცენტრში მუშაობს. თავისუფალ დროს მას უყვარს ცურვა კალათბურთის თამაში.

ანა-როუზი თავის ისტორიას ყვება და ამბობს, რომ თავს ჩვეულებრივ ადამიანად ხედავს. მას, ისევე როგორც დაუნის სინდრომის მქონე ბევრ ადამიანს, სურს რომ თავისი პოტენციალის რეალიზება მოახდინოს და ლამაზი, მრავალფეროვანი ცხოვრება ჰქონდეს.

3. არავითარი განსაკუთრებული საჭიროებები

დაუნის სინდრომის მქონე ადამიანებზე უამრავი მითი არსებობს. რეკლამა გვიყვება, რომ მათ განსაკუთრებული პირობების ნაცვლად, განათლება, სამუშაოები, შესაძლებლობები, მეგობრები და სიყვარული სჭირდებათ.

4. მე შენი ფანი ვარ

რეკლამაში მამა ყვება, როგორ ელოდა, რომ მისი შვილი ბიჭი იქნებოდა, რომელსაც ფეხბურთს ასწავლიდა. თუმცა ის ლამაზი გოგოს მამა გახდა.

"ძალიან მინდოდა, შენთვის ფეხბურთის თამაში მესწავლებინა, თუმცა ეს შენი სპორტი არ იყო. საბოლოოდ კი, თავად მასწავლე როგორია ცხოვრება. მე შენი უდიდეს გულშემატკივარი ვარ".

ვიდეორგოლი სააგენტო Y&R-მა გადაიღო Special Olympics-სთვის - ჩემპიონატი, რომელშიც შშმ პირები მონაწილეობენ.

5. ოცნებები

ეს რეკლამა ცნობიერების ასამაღლებლად 11 წლის წინ გადაიღეს, როდესაც მსოფლიომ დაუნის სინდრომის შესახებ ბევრი არაფერი იცოდა.

რეკლამის გმირები ვიდეოს დასაწყისში იმ განსაკუთრებულ შესაძლებლობებზე ყვებიან, რომლებითაც ამაყობენ. შემდეგ კი თავიანთ ოცნებებზე უამბობენ სამყაროს.